Executive Chef Bert Ceralde Jr. serving his carbonara pasta with spicy sausage, fried chicken wings, and lettuce salad.
3 MIN READ
Ni BRENDA S. DACPANO
www.nordis.net

Itatta a panawen a nagadu ti kompetision iti aniaman a tay-ak ti negosio, masapul a managpartuat ken inovativo tapno makauna iti lumbaan. Kasta ti panagkitak iti inovasion ti Blaqk Street Bistro, maysa a bassit a restaurant a tagikua ni Executive Chef Darell Ceralde Jr. nga agidasdasar iti Mexican, Italian ken French cuisine.

Ti bistro ket naibuangay idi 2015 idiay Bakakeng, iti Siudad ti Baguio ngem immalis iti Bonifacio Street idi 2017. Agiserserbi daytoy iti ipanpannakkelna a blaqk street burger wenno nangisit a burger. Ti patty ket naaramid manipud iti organiko a karne ti baka. Ti tinapay wenno bun daytoy a burger ket nalaokan iti activated bamboo charcoal wenno uging ti kawayan. Kinuna ni Ceralde a daytoy ti kaunan a black burger ditoy pagilian. Ngem segun iti panagsukisokko iti internet, addan ti immuna, ti Monster Bites a naibuangay idi pay 2014 idiay Tondo, Manila nga agar-aramid iti black burger nga agramen iti tinta ti pusit ket uging ti kawayan ken nangitakder pay iti sanga a restaurant iti asideg ti UST. Idi met laeng 2014, nairusat ti black burger ti Burger King a branch-na idiay Japan. Adda met ti black burger ti McDonald’s a yin yang burger a mailaklako iti branch-na idiay China.

House specialty Blaqk Street Burger.

Saanko a maikompara ti black burger ti Blaqk Street Bistro ta awan pay met ti sabali a naramanak a black burger. Ngem segun iti naramanak, naimas ti burger-da. Iti amin a naramanak a burger, daytoy laeng ti husto kaniak ti timpla ti patty-na, saan a naapgad. Adu dagiti naimas met a burger ditoy Baguio ngem naapgad iti panagramanko. Ti nangisit a bun ket addaan bassit nagdumaanna iti puraw a bun ngem awan met ti nalatak a naggidiatanna. Saanko a mailasin no ania a keso ti nausar ngem kalalainganna laeng ti ramanna ta saanna nga abaken ti raman ti patty.

La Rosa Burger

Ti la rosa burger wenno pink-bun burger ket nalaokan iti petal ti rosas a maris rosas. Immuna nga inrusatda daytoy idi 2017 idiay Session Road in Bloom iti Panagbenga. Kinuna ni Ceralde a maris rosas ti inusarna ta nasam-it kano daytoy kumpara iti rosas a nalabaga a napait bassit. Napalamanan daytoy iti chicken patty ken naiwa a mansanas, ken addaan iti special Blaqk Street sauce. Bukodda nga aramid dagiti sauce wenno sarsa nga us-usarenda ken ilaklakoda ditoy. Adda ti agarup 22 a klase ti sili ti us-usarenda kadagiti ilutlutoda a sauce. Dagiti bukel ti sili ket naggapu pay iti abroad nga immulada idiay Bulacan nga isu’t paggapgapuan ti ilutlutoda. Malaksid iti sauce, aglaklakoda met iti nadumaduma a klase ti suka: pomegranate (prutas a granada), saba, masaflora ken dadduma pay.

Adu ti pagpilian iti menu-da. Adda pizza, pasta, gluten-free pancake, karne, seafoods, kdpy.

Ti nasayaat ditoy, malaksid iti panagpadur-as iti healthy food, agawatda kadagiti empleado nga addaan naidumduma a kabaelan wenno differently-abled persons wenno persons with disability (PWD). Agawatda pay iti mangayat nga agsanay iti panagluto wenno apprenticeship.# nordis.net

This site uses Akismet to reduce spam. Learn how your comment data is processed.