Home Ilocano Opinion Kakabsat a mannalon, labanan ti pamutbuteng ken pammadakes dagiti pasista!

Kakabsat a mannalon, labanan ti pamutbuteng ken pammadakes dagiti pasista!

69
0
2 MIN READ
Ti TIMPUYOG TI MANNALON TI KALINGA
www.nordis.net

Iti kalabes, iti maysa a briefing iti Konggreso, nagiparuar ni Major General Reuben Basiao, Deputy Chief for Intelligence ti AFP, iti listaan ti 18 a “front organizations” dagiti “communist terrorist groups”.  Nairaman iti daytoy a listaan ti Timpuyog dagiti Mannalon ti Kalinga (TMK); naisilpu pay ti nagan ti Oxfam, maysa kadagiti internasyunal a non-governmental organizations (NGO) a timmultulong kadagiti kameng ti TMK kadagiti panawen ti didigra.  

Daytoy a pammadakes iti TMK ken Oxfam ket paset ti programa ni Presidente Rodrigo Duterte iti panangliplipit ken panangiparmek kadagiti organisasyon nga agtigtignay para kadagiti karbengan ken interes dagiti demokratiko a sektor iti gimong.  Kondenaren ti TMK daytoy a pasista a programa!

Ti TMK ket kabayagan ken kalawaan a pederasyon dagiti mannalon iti Kalinga.  Naibangon daytoy idi dekada 1980, ket 102 nga organisasyon dagiti mannalon ti miembros na iti agdama.  Dagitoy ket organisasyon dagiti nakurapay a mannalon, karaman dagiti mangmangged-talon, iti nadumaduma a munisipalidad ti Kalinga. 

Ti TMK ti probinsyal a tsapter ti Alyansa dagiti Pesante iti Taeng Kordilyera (APIT TAKO), nga isu ti sektoral a pederasyon dagiti pesante iti uneg ti Cordillera Peoples Alliance.  Rehistrado ti TMK iti Department of Labor and Employment-Cordillera Administrative Region (DOLE-CAR).  Ken sakop ti TMK iti rehistrasyon ti Cordillera Peoples Alliance iti Securities and Exchange Commission (SEC).

Manipud idi naitakder ti TMK ket adun dagiti naaramidan na tapno itandudo dagiti karbengan ken iyabante dagiti interes dagiti mannalon, saan laeng iti Kalinga nu di ket iti intero a Kordilyera.  Aktibo a nakipaset ti TMK kadagiti panagtignay tapno masalakniban dagiti ansestral a daga, rekursos, ken kabiagan dagiti mannalon iti Kalinga ken iti rehiyon, ken tapno maipaay dagiti umno a serbisyo kadagiti mannalon manipud iti gubyerno.  Iti agdama, pumaspaset ti TMK iti tignayan kontra iti Rice Tariffication Act wenno Rice Liberalization Law, a maigapu ti pannakalugi dagiti mannalon nga aglaklako ti produkto da nga irik.

Iti nagsasaruno a tawen, manipud iti Typhoon Juan idi 2010 inggana Typhoon Ompong idi 2018, nakakaro a didigra ti nasagrap dagiti mannalon ti Kalinga.  Nakikadua iti TMK ti Oxfam ken dadduma pay nga NGO tapno matulungan dagiti naapektaran a mannalon.  Ti Oxfam ket  tumultulong kadagiti marigrigat nga umili iti nadumaduma a pagilian, agraman ti Pilipinas. Dakkelen ti naitulong na tapno makabangon manen dagiti umili manipud iti epekto dagiti didigra.

Saan a dakes ti agtignay para iti karbengan ken kabiagan!  Saan a dakes a tumulong kadagiti madidigra.

Kakabsat a mannalon, ituredan ti panangliplipit kadatayo ti pasista a rehimen ni Rodrigo Duterte.  Ituloy ti laban! # nordis.net

This site uses Akismet to reduce spam. Learn how your comment data is processed.