Home Topic Law & Legislations Biktima ti Martial Law makaawat iti reparasion manipud iti Marcos paintings

Biktima ti Martial Law makaawat iti reparasion manipud iti Marcos paintings

83
0
< 1 MIN READ

Ni BRENDA S. DACPANO
www.nordis.net

BAGUIO CITY – Agarup 7,500 a biktima ti Martial Law manipud iti Hawaii class suit ti makaawat iti kuarta a reparasion. Ti reparasion ket manipud iti naglakuan iti dua a paintings a tinakaw dagiti Marcos idi panawen ti Martial Law.

Ni Robert Swift, abogado dagiti biktima ti Martial Law iti Hawaii class suit, ti mangiwanwan iti naglakuan iti paintings basar iti bilin ti korte ti New York idi Setiembre 2018. Manipud iti report ABS-CBN News a naiposte iti internet, kinuna ni Swift a mabalin a mairugi ti panangited iti reparasion inton Mayo 1. Agbayag daytoy iti siam a lawas ken dinawatna ti tulong ti Commission on Human Rights iti panangiwaras iti reparasion.

Tallo a paintings a nakumpiska kenni Vilma Bautista, dati a personal a sekretaria ni Imelda Marcos, ti naiplastar iti auction idiay Christie’s New York, USA. Nailako iti Nobiembre 11 ti dua kadagitoy a painting – “L’Eglise a La Seine a Vetheuil” ni Claude Monet, French impressionist ken “Langland Bay” ni Alfred Sisley, Bristish landscape artist. Ti Monet painting ket nailako iti $2.6 million bayat a $900,000 met ti Sisley painting. Awan ti damag no nailakon ti maikatlo a painting a “Le Cypres de Djenan Sidi Said” wenno Algerian View iti French painter a ni Albert Marquet nga agbalor iti $90,000 – $120,000.

Agdagup iti $3.4M ti naglakuan ngem segun kenni Swift adda $13.75M (agarup $1,500/biktima) a maiwaras kadagiti biktima ken $4M para iti gobierno ti Pilipinas.

Dagiti paintings ket paset ti agarup 200 nga art collections dagiti Marcos iti nasurok a 20 a tawen a panagturayda iti pagilian.# nordis.net

This site uses Akismet to reduce spam. Learn how your comment data is processed.