Apit-Sagada general assembly, naisayangkat

Ni DIONY ALSAEN
www.nordis.net

SAGADA, Mountain Province — Naisayangkat ti umuna a General Assembly ti Asosasyon Dagiti Pesante ti Sagada (Apit-Sagada) idi Marso 21, 2018 babaen iti panangipataray ni Brenda Fuchay ti programa ken panang tarawiwid ti Asosasyon Dagiti Pesante ti Montanyosa.

Ti tema ti asembliya ket: “Mapagkaykaysa, Makapalawa ken Mapapigsa ti Tignayan dagiti Peasante para iti Sumarsaruno nga Ubbing.”

Adda agarup duwapulo ket siyam a nakipaset iti asembliya karaman dagiti nagapu iti nadumduma a sektoral nga organisasyon manipud iti Southern Sagada, South Central Sagada, Central Sagada, Eastern Sagada, Northern Sagada ken uray iti ruwar ti munisipyo. Dagiti nagapu ti Apit-Montanyosa ti naimbitaran a bisita ken nagited ti innadal para iti asembliya. Naragsak dagiti immatendar ti aktibidad gaputa addan mangreppet kadagti mannalon ti Sagada para kadagiti kampanya ken pagsayaatanda.

Nayon a naimbitaranda Sagada Mayor James Pooten Jr. (nga inrepresentar ni bise mayor Ben Capuyan) ken Bauko Mayor Abraham Akilit a saan a nakaumay gapu iti dadduma a trabahona.

Ti Kura Paroko ti Saint Mary the Virgin Parish a ni Reverend Father Constancio Naoy ti nangited ti kararag kas pangrukat iti pormal a programa. Ibingay ni Fernando Mangili, pangulo ti Asosasyon dagiti Pesante ti Taeng Kordilyera (Apit-Tako) ti kasasaad ti mannalon ti pagilian ken rehiyon ti Kordilyera. Inikkan daytoy ti ladawan iti tukad probinsya ni Apit-Montanyosa Chairman Rodolfo Liwanen Jr.

Simmaruno a dagus ti nabara a panangpasangbay ken panangited ti kasasaad dagiti pesante ditoy Sagada ken dagiti kampanya ni Apit-Sagada Adhoc Chairman Esteban Solang ken ti silpona iti kasasaad iti probinsya. Inbingay pay ni Fuchay ti kabuklan a buya ti programa.

Inyebkas ti bise mayor ti nalaos a panagyaman iti pannakaimbitarna. Kinuna a mabalinda tumulong iti panagpaka-accredit ti Apit-Sagada iti munisipyo kas maysa nga asosasyon.

Kas panangleppas ti aktibidad, naaramid ti panagbotos kadagiti opisyales ti organisasyon. Indauloan ni John Lipato Sr. Commision on Eleksyon a nangiwanwan ti eleksyon. # nordis.net

Share

Leave a Reply

This site uses Akismet to reduce spam. Learn how your comment data is processed.