Home > Op-ed | To bottom

Dagiti saludsod iti baro a tawen

Ania ti Baro a Tawen? Isu ti panagsukat ti tawen. Kunada a ti baro a tawen ket baro a sirmata, baro a namnama, no malas mo ti napalabas a tawen...bareng no swertem iti daytoy panagsukat ti tawen. Wen, Baro a Tawen manen. Ania ngata manen dagiti pagteng a mapasangbay? Adda kadi napintas a masakbayan wenno nakaro pay a panagrigat? Mayat man nga intay sublian ti napalabas a tawen.

Iti naglabas a tawen, ania dagiti naaramidan, naka-upayan ken krisis a sinango? Ania dagiti pagbutbutngan, ragsak, liday, balligi, sakit ti nakem, rigat, lulua, karit, adal ken dadduma pay a nagpasaran? Dagitoy kadi ket naka-ited kired, tibker ken tured a mangsango kadagiti ania man a sumangbay iti daytoy baro a tawen tapno buyogen ti napintas a sirmata?

Ti tunggal tao ket adda naited kenkuana a kabaelan ken paglaingan, depende iti paka-aramatan. ken no kasano a pandayen tapno pagnumaran ken mapasayaat ti panagbiag. Dagiti saguday ket saan laeng koma nga agserbi para iti bukod a pagimbagan, ngem ketdi para iti kaadduan. Napateg ti panangsubli iti napalabas tapno kitaen ken amirisen dagiti paspasamak ket makita no kasano nga agtuloy wenno agrugi manen.

Kuna ti maysa a manursuro a ti Baro a Tawen ket saan laeng a panangselebrar iti panagsukat ti tawen, panagaramid iti New Year’s Resolution ken panangpadpadaan iti sumaruno a panagkasangay, ngem ipasimudaagna payno nausar kadi dagita nga aldaw nga adda kaes-eskanna bayat iti panaglabas da ken kasano tayo pay nga ikkan importansya dagiti sumangbay nga aldaw iti baro a tawen. Naduma-duma ken adu a kapanunotan ti maparnuay ti tao kada umay ti baro a tawen.

Kas maysa a babai, ina, wenno asawa, dagiti kadi naglabas a krisis, problema wenno ania man a pakasikuran ket situtured a sinango ken marisut? Iti pamilya, iti asawa man wenno kadagiti anak, naipaay kadi ti umno a rebbengen? Kumusta met ti panangsango iti trabaho nangruna no nalawa ti saklawna. Dagitoy kadi ket naipaay ti umno a solusyon kadagiti nagkurangan? Lagipen, amirisen tapno maliklikan dagiti biddut ken sanguen dagiti di mapakpakadaan a risiris a dumteng.

Kunada a ti di agamiris, mangsubli wenno manglagip iti napalabas ket tao nga awan napintas a sirmatana iti masakbayan. Kasapulan  ti panangsubli iti napalabas tapno makita ken maamiris dagiti kamali, ti nagdur-asan wenno naaramidan a nasayaat, ti naka-itibkulan, dagiti lapped ken oportunidad tapno nagballigi. No makita amin dagitoy, naturtured ken natibtibker ti pakinakem a mangirusuat iti ania man a ganuat, ammo no kasano a sanguen dagiti sumangbay a problema ken liklikan dagiti tuben, saan a bumdeng ken agsarimadeng

Iti daytoy baro a tawen, natibker ken sisasagana ka kadi a mangsaranget iti ania man a karit ti masakbayan? Sidadaan ka kadi nga agdaliasat iti baet ti riribuk a parparnuayen ti awan durina a panagdaulo ken nadawel a linteg militar? Napnuan ka kadi pay iti namnama para iti natalged a kasasaad ti panagbiag? (Dagiti sungbat inton sumaruno.) #

Post your comments, reactions to this article

Home > Op-ed | Back to top