Home > Op-ed | To bottom

Dua a Panagbenga

Maymayat no dua ti Panagbenga, kuna ti maysa nga aglaklako ti kutsilyo iti Burnham Park. Ad-ado kano nga aldaw ti umayan dagiti tattao ket umado ti inna paglakuan.

Madi met ti maysa nga agsagsagad iti dua a Panagbenga ta at-atiddog ti pakaistorbuan dagiti umili ti Baguio.

Uray ti ordinaryo a drayber ti dyip ket madi na ti dua ti Panagbenga. Natrapik unay ket mataktak dagiti agluglugan iti publiko a transportasyon ,kunana.

“We are now a laughing stock,” kuna ti maysa a negosyante. Katkatawaanda tayo dagiti agbuybuya manipud iti ruar. Apay kano a nakaad-ado a sao panggep iti Panagbenga ket awan pay ti usto a plano?

Saan a maaw-awatan dagitoy pulitiko nga agkonkontrol iti Panagbenga ti implikasyon no saanda nga agkaykaysa iti selebrasyon ti Panagbenga. Aminda ket agibagbaga a masapol a lipatan pay dagiti saan a panagkikinnaawatan tapno naannayas a maisayangkat ti flower festival itatta a tawen. Ngem, awan uray maysa kadakuada ti mayat a bumaba iti pedestal tapno kuma agsabat iti nasaysayaat a pamay-an. Awan ti kayat a mangsolbar iti problemada iti tunggal maysa.

“Agpipinnabasolda pay!”, kuna dagiti tattao.

Ti Baguio Flower Festival wenno Panagbenga ket bagi ti tattao iti Baguio, kunada. Saan a bagi ti sumagmamano a pulitiko a kayat a manggundaway iti umayan ti ado nga advertisers ken agpabanglo kadagiti umili a botante. Uray dagiti adda iti sektor ti turismo ket daytoy ti ibagbagada.

Masapol nga adda ti ag-agpayso a panagkaykaysa iti panagbuya iti Panagbenga.

No iti benneg dagiti negosyante, kunada a masapol nga adda ti long-range planning iti panagisayangkat ti kastoy a dakkel nga aktibidad nga umayan ti ado a tattao. Kunada nga uray dagiti turista ket long-range ti planoda. Saanda nga agplanplano a kas dagiti lokal a tattao nga umay laeng nga agbuya no addan ti mabuya. Dagitoy ket agplanoda nga umay tallo inggana ennem a bulan pay sakbay ti Panagbenga.

Adda dagiti mangkunkuna a naladaw unay ti panagplano para iti flower festival itatta a tawen. Nataktak unay daytoy kadagiti aramid dagiti pulitiko a lokal. Imbes nga agkaykaysa, ti ketdi inaramidda ket nag-innunada iti panagplano. Imbes a nagtugaw iti maymaysa a plano, nagaramidda ti dua a plano. Imbes a nagkinnaawatanda, karkaro a limmawa ti saanda a nagkikinnaawatan. Imbes a narisut dagiti parikot, kimmaro pay dagitoy.

Saan tayo a maibaga a nagrugi ti krisis ti Panagbenga iti maysa a resolusyon ti konseho nga agisubsubli ti panangmanehar ti flower festival ti Baguio Flower Festival Foundation gaputa nakita ti konseho a saan a nabaydan ti Baguio Panagbenga Flower Festival Association dagiti obligasyonna nangnangruna dagiti premyo.

Sakbay pay ti kontrobersyal a Resolution 194, ado a sayanggusing ti nangngeg.

Ti Foundation ti sigud a nangmanehar ti flower festival manipud idi ibbatan ti Bases Conversion Development Authority daytoy idi 2003. Kuna ni Mayor Braulio Yaranon a saan a na-liquidate ti Foundation ti cash assistance ti syudad a P4.4 milyon isunga idi 2005 iti Association nga inpaima ti syudad ti Panagbenga. Kas agdadamo, adda dagiti nagkurangan ti Association, kas iti nailanad. Ti Foundation ket kontrolado ti kampo ni Congressman Mauricio Domogan karaman ni Atty. Damaso Bangaoet. Ti Association ket kunada a kontrol ti pribado a sektor a dadauluan ni Nelia Cid ngem adda ti basbas ni Yaranon.

Uray iti maysa nga aktibidad ti sektor a turismo ket makita ti ima dagiti pulitiko. Uray kunada nga ipaimada daytoy kadagiti pribado a sektor kas kenni Nelia Cid ken Damaso Bangaoet, saan a makaluban ti aramid dagiti pulitiko.

Mano ti kuwarta iti Panagbenga nga inda pagi-innagawan? Daytoy ti saludsod ti ordinaryo a tao.

Uray ti Obispo ti Romano Katoliko a ni Bishop Carlito Cenzon ket saanna a kinabaelan a pagsabaten ti interes dagiti pulitiko. Anya pay ngay ti nabatbati nga aramiden dagiti umili ti Baguio no kastoy?

Agbuya tayo laengen ti dua a Panagbenga, kunak. Ngem kuna dagiti nakasaok, “Saan a dayta ti mangtaktak kadatayo!” #

Post your comments, reactions to this article

Home > Op-ed | Back to top