Home > Op-ed | To bottom

Alternatibo a paglakuan

Nangngegak nga adda manen ti kasegseg-ang a napasamak kadagiti kakailian nga aglaklako iti Harrison Road idi malem ti Huwebes. Idi napanak sadiay idi bigat ti Biyernes, awanen dagiti gayyem a sidewalk vendors iti igid ti alad ti parking lot.

“Pinaikkatda manen isuda,” kuna ti maysa nga aglablabas.

Kunak no inaramidan ni Mayor dagitoy ti puwesto a paglakuan iti igid ti nasau a kalsada?

Uray dagiti aglaklako iti Session Road iti rabii ket awanda idi rabii ti Biyernes. Awan ti innak pagsaludsudan no kaano pay a naawan dagitoy. Daksang gasat, iti lamiis ti rabii, nabayag a saanak nakapan iti makunkuna a “night market” iti Session Road. Ti maudi a nalabasak dagitoy ket idi Oktubre pay.

Mayat a buybuyaen laeng ti night market ti syudad ti Baguio. Maysa daytoy a daydayuen dagiti turista. Maysa daytoy a nagbalin a tourist attraction ti syudad. Agrugi ti 8:00 ti rabii inggana 10:00 daytoy.

Ngem iti likodna daytoy, ket maysa a polisiya ti syudad nga agiparparit iti panag-usar kadagiti kalye ken parke kas pagbirukan ti pagbiag. Kunada a saan laeng nga ti syudad a maiparit ti komersyo kadagiti kalsada ta maysa a republic act ti mangiparparit ditoy.

Anya ngay ket saanen nga umannatop dagiti linteg iti umad-aduan dagiti nakurapay nga umili iti pagilyan. Nasken laeng nga agaramid ti umno a linteg tapno mawaswas dagiti saanen a maiyaplikar.

Daytoy proyekto a night market ket mangparigat kadagiti nakurapay nga umili iti syudad. Imbes nga aginana dagiti aglaklako, adda da pay laeng kadagiti palengke nga agbirok ti isaang iti inaldaw-aldaw. Imbes nga agkukukukot dan ta nalamiis ti panawen, adda da nga agsagsagrap ti lamiis ti angin ken anep.

Imbes a matulungan da’t annak kadagiti trabaho iti balay ken masuruanda dagitoy ti leksyon, ibatida dagiti ubbing. Ibatida dagiti babassit a dungngo kadagiti peggad nga umabuso iti kina-ubbingda.

Maysa pay, uray dagiti aglako ken gumatang ket naka-expose iti peggad ti kriminalidad. Nakaad-ado itatta ti holdaper ken isnatser iti syudad. Imbes a pagbiag ti biruken dagiti aglaklako, ipapatay ti mang-ur-uray kadakuada. Kasta met dagiti gumatang. Iti panagbirok ti pangalaan ti nalaka a magatang, karkaro a manginaan dagitoy no maholdap wenno ma-isnatch ti alikamenda.

Masapol pay nga agtaxi dagitoy ta iti syudad ket awan ti byahe ti kaaduan a linya ti dyip inton rumabrabii.

Mayat koma no ti puwesto nga ited ti syudad iti Harrison Road ket mabalin a paglakuan uray iti aldaw ken malaon na amin a babassit nga aglaklako nga awan ti puwestoda kadagiti palengke.

Mayat met ti proyekto a barangay flea market tapno saan nga amin a tindera ket adda iti uneg ti dakkel a palengke.

Maysa pay, mayat a pagelan dagiti maseknan nga opsyal ti palengke dagiti adda ti puwestoda tapno saandan a rumuar kadagiti kalsada. Napunno manen ti lako dagiti kalsada iti palengke isunga nalipit dagitoy ken narigat ti agdaliasat karkaro no ado ti awit.

Kamayatan latta no adda pay ti dadduma a pangkabiagan a maited kadagiti dadduma nga aglaklako iti palengke.

Ti problema, ayanna ti political will tapno maiyaramid dagitoy a singasing? #

Home > Op-ed | Back to top