Home > Op-ed | To bottom

Panaglibak

Inaramid da manen a kasla sinsinan ti aglibak iti sango ti publiko. Saan nga ammo dagiti tattao no sino ti inda patien.

Daytoy sigud a komisyoner ti Commission on Elections a naglemmeng manipud idi natakwatan ti panagsaur iti napalabas nga eleksyon ket nanglibak manen. Kuna ti asawana, saan a nag-abroad daytoy.

Kuna met ti rekord ti Singapore a ni Garcillano ket nagbisita sadiay idi July 14. Kasano na pay a mailibak a nag-abroad daytoy tapnu laeng maliklikan na’t imbestigasyon.

Ngem adda manen ti record a mangipakita a ni Garcillano ket adda iti Mindanao. No patien tayo pay ti dokumento a nagapo iti gobyerno ken dagiti mangibagbaga a nakasauda ni Garcillano, adda gayamen iti pagilyan daytoy.

Asinu ngay ngata ti patien tayo? No agpayso a saan a pimmanaw daytoy, apay a kasapulan nga aglemmeng isuna?

Sabagay, no anya ti imbaga ti amo ket isu ti suruten dagiti asu-aso.

Kasla awanen ti mabalin a patien ti tattao no ti kameng ti gobyerno ti agsasau. Saan laeng a dagiti politiko ti saan a mapiar itatta.

Idi napalabas a lawas ket maysa a miyembro ti gabinete ti adda iti syudad. Immay daytoy nga agpannakkel nga awan ti narugit iti departamentona. Kasla saan nga ammo ti tattao a ti Departamento ti Public Works and Highways ket maysa kadagiti karurugitan nga ahensya ti gobyerno.

Uray anya ti ibaga ni Hermogenes Ebdane nga isu ti “highway patrol” nanipud idi na-appointaran isuna a mangidaulo ti DPWH, saan daytoy a makalibak a napnuan pay laeng ti korapsyon dagiti proyekto ti DPWH.

Isu ti ayan ti adu a kwarta, kunada. Isu ti ayan ti nakanginngina a presyo ti semento, lansa, pintura, ken dadduma pay.

Ay ina, aya, kaarruba? Kasano met ti aramiden dagiti kontraktor no kada opisina a dalanen dagiti papel ket adda ti SOP a saan a bumaba ti 10%? Inayonda a talaga iti presyo ti materyales ken iti bilang ti tattao a masuwelduan.

Saanak pay unay makasau iti kakastoy a banbanag ngem umanay ti kapadasan dagiti nagnanaedak a komunidad tapno maibagak a makapasarwa ti aramid dagiti sumagmamano nga opisyales ti gobyerno tayo itatta.

Saan met a mailibak a napnuan ti panagsaur daytoy nga administrasyon. Ngem saan laeng a daytoy nga adminstrasyon ti nagsaur. Saan a mailibak a tunggal malpas ti eleksyon ket ado a protesta ti maawat ti Comelec ken electoral bodies. Pamaneknek dagitoy nga uray iti kabassitan a posisyon ket inda pay sauren.

Ti panaglibak iti sango ti tattao, karkaro iti sango ti masmidya ket dakkel a biddut. Sarmingenna ti kagagalad ti gimong, saan laeng ti nag-aramid.

Ngem ti pakasaritaan ti agipataw to ti umno a panaghusga. Saan a makalibak ti pakasaritaan karkaro no ti masmidya ket saan a aginbubulag ken saan nga agintutuleng. Malaksid no dagiti kameng ti masmidya ket naikkatan ti tured nga agibutaktak, saanda a mabalin a suktan dagiti pasamak.

Koma kaarruba ta adda pay ti namnama tayo iti masmidya. #

Home > Op-ed | Back to top