Home > Op-ed | To bottom

Saan nga agserbi ti gobyerno iti proletaryo

Agtultuloy a naranggas ti estado kadagiti agwelwelga a mangmangged ti Lepanto. Ti pannakirupir dagiti mangmangged ken minero para iti apag-usto a suweldo ket sungsungbatan ti gobyerno ni Gloria Macapagal-Arroyo ti nakaro a panagparigat. Saan laeng a dagiti mangmangged ti marigatan iti kastoy. Mainayon a manglak-am ti kinarigat dagiti pamilyada.

Kasano pay koma a maikkan ti namnama dagiti mangmangged no uray dagiti soldados ti gobyerno ket addadan iti Mankayan. Anya pay koma ti aramiden ti gobyerno a mangbuteng kadagiti tattao? Ti 14 a naranggas a pannakaburak dagiti piket kadagiti pag-unegan ti minas ket naiyaramid amin iti parbangon no sadino ket awan unay ti agbanbantay.

Inamin ti maysa a nangato nga opisyal ti PNP a masapol nga iyaramid da ti taktika a “Hitting the enemy when it is at its weakest”. Kayatna a sawen nga intudingdan dagiti agwelwelga a kabusor.

Saan a kaskasdaaw daytoy. Ta no saan a kabusor ti panangkita dagiti armado kadagiti mangmangged, saanda koma nga aramiden ti kinaranggas. Nagbalin ketdi a kabusor ti estado ti mismo a mangmangged ken minero a mangparpartuat ti nabalor a mineral manipud iti puseg ti daga. Anyan nga awan babain dagitoy a kameng ti militar ken ti pulis.

Dagiti kakailianda ken padada a nagapo kadagiti napapanglaw a dasig ken sektor ti inda ketdi rangranggasan. Agserserbida kadagiti amoda a kapitalista iti minas ken agturturay. Dida la aya mapanunot nga isakit ti interes dagiti mangmangged ken mannalon a nabayag a naparigatan ti dadakkel a kumpanya ti minas?

Iti kalabes, adda manen ti naipadamag a baro a kumpanya ti Philippine Army iti Mankayan. Gapo kano daytoy iti nakita dagiti takrot nga opisyales ti minas a nasurok a sangagasut a kameng ti New People’s Army iti nasao a munisipyo. Ibagbagada pay nga adda ti nakitada nga NPA iti baet dagiti welgista. Sino ngay met ti mamati iti kastoy nga story line?

Ti makitak ditoy, kaarruba ket mabuteng ti gobyerno ken ti kapitalista kadagiti welgista. Mabutengda a bumayag ti welga gaputa no saan nga umentra dagiti mangmangged ken minero, dakkel ti lugi ti kumpanya. Mabainan ti gobyerno, malugi ti kumpanya. Kayatda a makaraman ti ranggas dagiti welgista tapno saanen a maulit ti welga iti minas. Butbutengenda met dagiti umay nga agsuporta a mannalon ken dadduma pay a sektor tapno mangkumbinsar dagitoy kadagiti minero nga umentra.

No kayatdan nga umentra dagiti minero, iteddan koma dagiti bassit a nayon iti suweldo ken benepisyo. Nasken laeng nga ikkan ti Lepanto ti bassit a pakalung-awan dagiti pamilya ti minero. Dakdakkelto pay ti maganar ti kumpanya iti kada eksperyensyado a minero nga umentra.

Ibagbaga ti kumpanya a nasurok P6 milyon ti maluglugina iti uneg ti maysa nga aldaw a saan a sumrek dagiti minero. Ibagbagana met nga addaan ti 600 a baro a minero iti uneg. Kayatna nga umentran dagiti ordinaryo a mangmangged ngem inikkatna iti pagtrabahuan dagiti opisyales ti unyon. Mangipakita daytoy nga adda amak ti kumpanya kadagiti unyonista. Union-busting daytoy, kuna dagiti unyonista.

Mabaelan ti Lepanto a mangipatangken ti posisyonna ta suportado daytoy ti militar ken pulis.

Itattak a nakita a nalawag no sino ti pagserserbian ti agdama a gobyerno. Saan a kaskasdaaw daytoy gaputa daytoy a gobyerno ket saan met a paset ti estado dagiti proletaryado.

Masapol pay nga itrabaho dagiti mangmangged ti maysa a gobyerno nga agserbi iti interesda. #

Home > Op-ed | Back to top