Home > Op-ed | To bottom

Pista’y dayat

Dandani manen ti Mayo Uno, kaarruba. Nu kadagiti mangmangged, daytoy ket aldaw ti dadakkel a rali a mainaig iti nayon a suweldo. Panawen met daytoy ti panangsingir iti gobyerno kadagiti tinawen nga inna ib-ibbatan a kari ti panagngato ti suweldo ket nasaysayaat a kundisyon ti pagtrabahuan.

Ngem kadagiti umili iti asideg ti baybay iti Pangasinan, daytoy ket dakkel a piyesta. Pista’y dayat, kaarruba.

Saan kon a malagip nu anya ti gapuna ken kaano a narugian a selebraran ti Pangasinan ti Pista’y dayat. Ti malagip ko, daytoy nga aldaw ti um-umayan ti adu a tattao iti igid ti baybay.

Kasla agbakasyon dagiti mangngalap ta saanda a mapan idiay adayo tapno agkalap. Dagitoy ket kadauyan a mainayon kadagiti parada’y baluto. Daytoy ket agsasaruno a bangka nga adda lugluganda a tattao. Kadauyan ket ni gobernador ken dagiti mayor ken opisyales ti naduma-duma nga ili.

Iti igid ti baybay ket adda ti salisal iti panag-aramid ti sand castles, a kadauyan a mainaig iti kabibiag dagiti mangngalap ti tema. Itatta ket adda pay ti ay-ayam mainaig iti panagkammel ti bangus.

Kanayon nga adu ti agdigos iti baybay karkaro nu agrugi nga awan ti tudo. Ngem ti Mayo Uno ti kaaduan ti tao. Adda nga adda’t pabuya iti igid ti baybay. Uray anya a dissu ket adu ti tao ngem kadagiti baybay ti Lingayen, Dagupan ken San Fabian ti kaaddaan ti organisado a programa.

Dagitoy a dissu ti baybay ti agi-innagaw kadagiti bisita. Kas iti dadduma pay a destinasyon ti turista, dagiti programa iti Pista’y dayat ket nakasentro iti panag-awis ti tattao.

Ngem kadagiti umili nga agnanaed iti ig-igid dagitoy a baybay, ti Pista’y dayat ket oportunidad nga agbirok ti pagbiag. Adu kadakuada ti aglako ti uray anya a makan, mainom ken tila-tila. Adda met ti sumagmamano nga agpa-abang ti beach umbrella wenno shed, a paglinungan dagiti sangaili. Ti dadduma ket agbirok ti luglugan a nailumlom iti darat nga inda tulungan ngem masapol nga agbayad.

Agrugi nga umado ti tattao iti igid ti baybay iti tiyempo ti Semana Santa. Umado nga umado dagitoy inggana iti umayan ti Pista’y dayat. Ket iti intero a bulan ti Mayo, mayat ti birok dagiti tattao. Malaksid a dagiti mangangalap ket dakdakkel ti birokda iti tiyempo ti kalgaw, ti pamilyada ket makabirok met gapo iti umayan dagiti turista. Pista nga agpaypayso.

Uray saan a Mayo Uno, uray saan a Pista’y dayat ket bumaba nga agpalamiis kadagiti baybay, ken swimming pools ti dadduma a taga-Kordilyera. Uray apagbiit laeng.

Kadauyan ket maysa nga aldaw laeng ti mabaelan dagiti kakailian tayo a mapan kadagiti baybay. Ti kaasikgan ket iti La Union. Ngem ti kadauyan a turong dagiti apan ag-beach ket iti San Fabian, Pangasinan.

Ti baybay ti kalakaan a paglanguyan ken paglippasan ti oras. Uray gastusan pay ti gasolina dagiti lugan wenno agplete ti tunggal maysa a mapan, nalaka latta nga excursion ti mapan kadagiti baybay ti La Union ken Pangasinan. Nalaka ti ikan ken naduma-duma a prutas kas ti mangga. Nalaka ti uging ken mayat nga agtuno ti uray tarong ken tahong laeng, nga isawsaw iti puro a bagoong ken suka ti nipa. Kaarruba, daytoy ti ammok a piyesta.

Uray sagpaminsan laeng iti makatawen ti Pista’y dayat, agpayso a piyesta daytoy. #

Home > Op-ed | Back to top