Home > Op-ed | To bottom

Danum a nadalos ken libre

Naimbag ta nagtudo iti napalabas a dua nga aldaw. Nu saan ket naregreg aminen dagiti bulong ti mulmula. Iti nabayag nga awan ti tudo ket kaasi dagiti mula a saan a nasibsibugan. Imbag laeng ta nagtudo.

Recycled water ti pagsibsibog ni Maestro Zaldo ket nalangto latta dagiti mulmulana. Ngem kunana a saanna pulos sibsibugan ti narugit a danum dagiti Baguio beans.

“Mayat a nadalos ti pagsibog karkaro tapno mayat ta makan,” kunana. Isunga ti magatang a danum ti inna insibsibog iti lubias ken uray iti sili ken sibuyas. Ti danum iti syudad ket kinanayon a magatang. Malaksid nu agkaratudo ket nadalusan manen dagiti salulog a pagnaan ti danum a mapan kadagiti tangke ken dram. Kadauyan a maitay-taya kadagitoy iti bubong dagiti balbalay.

Inton kanayon ti tudo, malibre manen ti pagsibog, paglaba ken pagdalos ti adu nga umili iti syudad. Kasta a kankanayon. Inton umay ti danum a libre, nakasaganan dagiti pagkabilan. Kasta ti biag ti kaaduan nga umili a nakurapay iti Baguio.

Ket nadal-dalos pay ti tudo, kunada, ngem ti iyeg ti Benguet Corporation (BC) a danum.

“Ay tuan,” kuna ti kaarrubak nga i-Benguet.

Nagpasyarak iti city hall idi Lunes ket naamuak a napan ti maysa a kagawad iti proposed water reservoir iti Antamok idiay Itogon. Nakitana ti pakaurnungan ti danum a maiyeg inton maited iti BC ti kontrata para iti bulk water supply project. Kunana a naapges ti angin iti aglikmot ti open pit. Ebidensya ti sulfuric nga angin. Nakaad-adu ti basura iti uneg mismo ti open pit ken ti danum sadiay ket berde ti kolor na, kunana. Makita pay ti agay-ayos a rugit manipud kadagiti balbalay ken ballmill dagiti mangngusok iti sitio Luneta ken ti barangay Ucab. Ti mismo nga open pit ket balay dagiti sabidong a magapo iti panagminas.

Ti open pit ket sigud a minas nga adda iti baba ti Tuding ken Ucab iti Itogon. Aramiden ti BC daytoy a pag-urnungan ti danum a magapo iti tudo nga inna iyeg para iti syudad. Kayatna a sawen, amin a rugit inton agtudo ket bumaba sadiay. Kasano ngata a kaluban ti BC daytoy tapno saan a mapan iti reservoir ti rugit. Inton kalubanna, saanen a makataya iti tudo.

Ay tuan! Sigurado a nalaing dagiti nagpanunot ti kastoy a proyekto. Agasem ta inda ilako ti danum a magapo iti tudo. Ket ti ammok, ti tudo ket nadalos ken libre, saan aya?

Ngem nu inurnong daytoyen ti BC, saanen a nadalos ken mabaydan daytoyen. Anyan a kinalaing! #

Home > Op-ed | Back to top