Home > Op-ed | To bottom

Dua a saludsod iti ipapatay ni Romy Sanchez

(Kaarruba, adda ti naawat tayo nga artikulo ti maysa nga agbasbasa ti NORDIS, ngem saanna a kayat nga ikabil ti naganna. Daytoy insuratna ti intay basaen itatta a lawas. Sapay koma ta agsurat manen isuna para iti kolum tayo kagiddan iti imbitasyon ti daytoy a kolumnista iti siasinuman nga Iloko a mannurat.)

Naimbag ta tinalantan ni kaaruba ti maipanggep kenni Romy Sanchez a pinaltugan da idi

Marso 9 idiay Kayang Street ti syudad ti Baguio. Idi naammuak ti pasamak, kayat ko nga agsurat a dagus ta ado ti rumrummuar a saludsod iti panunot ko. Dagitoy met laeng a saludsod ti nangiduron kaniak nga agturong idiay Kayang tapno makitak mismo ti lugar a napasamakan ti kasegseg-ang nga aramid ti maysa a tao (ngem apay makuna tayo a tao ti mangar-aramid iti kastoy ?).

Kabayatanna naammuak met laeng nga adda ti maisayangkat a misa idiay Resurrection Church sakbayda nga iyawid idiay La Union ti bangkay isunga napanak nakipaset. Madlaw kadagiti amin nga adda idiay ti ladingit ngem nakarkaro iti pamilyana. Ngem makunak a naisalsalumina ti panagladingitda gaputa makitak ti kadakuada nga iti likod ti nasakit la unay a panangpapatay iti kadua ken gayyemda ket natitibker ken natuturedda latta a mangipukkaw ti “Hustisya para kenni Romy! Makibaka, huwag matakot!” ken adu pay a panawagan.

Adu ti timmabuno isunga dandani pay a nagkurang ti pagtugawan. Adu pay met dagiti nagapo iti midya. Isunga kinunak iti bagik a daytoy ti pakakitaan a saan laeng a sinsinan a tao ni Romy. Daytoy ti mangipakita nga isuna ket maysa a respetado nga organisador, gayyem, kabsat ken asawa a kas imbaga dagiti nadumaduma a nangibingay ti mensahe.

Ngem kaarruba, kayat ko a sublian ti saludsod ko ta saan a makatalna ti panunot ko aginggana a saan ko a maibaga dagitoy.

Umuna, apay ipalubos tayo a kastoy ti mapaspasamak iti Baguio? Kanayon a maipabpablaak iti pagiwarnak a ti Baguio ket naulimek ken hospitable dagiti tattao. Awan met siguro ti mangtubngar iti daytoy ngem iti napasamak a panagpaltog kenni Romy, makuna tayo pay kadi a naulimek ti ay-ayaten tayo a syudad?

Apay nga awan ti immarayat ?Awan kadi ti nangbigbig iti awanan-puso a kriminal?

Malagip ko idi addaak iti high school ti imbaga ti madre nga agisursuro ti religion kadakami. Kinuna nga “Nu adda ti nakitam a maysa nga agar-aramid ti dakes ket saan mo pulos nga itayag ti imam tapno tubngarem ti aramid na, arig na met laeng nga inaramid mo ti dinadakes nga aramid na.”

Ngarud kaarruba, adda kadatayo ti sungbat nu ipalubos tayo dagitoy a mapaspasamak.

Maikadua, kanayon nga agpukpukkaw dagiti militante a grupo nu adda dagiti isyu a kayatda nga ipakaammo ken dawaten ti suporta dagiti umili wenno sungbat dagiti maseknan nga opisyales wenno ahensya ti gubyerno. Gapu iti daytoy, inawagan ti gubyerno isuda a terorista. Nu siak a maysa ket agwingiwingak gaputa ti ammok a depinisyon ti terorista ket dagiti agar-aramid ti dinadakes. Apay dakes kadi a mangiyebkas ti kapanunutan? Dakes kadi nga agirengreng kadagiti maseknan ti kayat mo a pagsayaatan ti kaaduan? Dakes kadi ti mangdillaw iti dakes nga aramid dagiti mangidadaulo ? Iti mano a dekada nga agipukpukkaw dagitoy a militante a grupo ti an-anekekan da, awan pay ti naidokumento a pimmatayda iti tao. Isuda ketdi ti matiliw, mapabpabutngan, ken mapatpatay kas iti napasamak kenni Romy. Itatta kaarruba, siasinno ngarud ti terorista? Kas iti nakunak, adda kadakayo, kaarruba, ti sungbat.

Nadagsen ti riknak idi isalog da ti bangkay ni Romy tapno idiay ilida a mabantayan ken maipunpon ngem uray pay kasta maymaysa laeng ti maibagak. Dakkel ti pammatik nga iti kada maysa nga aktibista a mapapatay dagiti nauulpit a military, adda ti sangapulo a rumsua a sumukat gaputa lumawlawa ti tignayan dagiti umili. Saludoak kenni Romy, dagiti kakaduana ken amin a natutured a mangitantandudo iti karbengan dagiti umili a mannalon nga isu ti kangrunaan a puersa iti pannakidangadang para iti nailyan a waya-waya ken demokrasya.#

Home > Op-ed | Back to top