Home > Op-ed | To bottom

Informed option para iti BENECO

“Bagi-en tayo ti BENECO,” kuna ti maysa nga opisyal ti Cooperatives Development Authority (CDA)), “tapno saan a datayo ti inna bagi-en.”

Agkamkampanya daytoy tapno agbalin nga stock cooperative ti BENECO wenno ti Benguet Electric Cooperative.

Ibagbaga ti AGHAM wenno ti Samahan ng Nagtataguyod ng Agham at Teknolohgiya para sa Sambayanan, maysa a grupo dagiti siyentista, a ti maysa nga electric cooperative ket nasken a tagikua ken imanmanehar dagiti miyembro nga isuda’t agpili ti miyembro ti Board of Directors ken mang-appointar ti General Manager.

Babaen iti maysa a general membership assembly, dagiti miyembro ti kooperatiba ti agaramid ti desisyon mainaig iti kooperatiba.

Kuna pay ti Agham nga uray non-profit, non-stock wenno stock cooperative ti pagbalinan ti BENECO, CDA latta ti mangsupervise iti operasyonna. Mabalin daytoy nga agregister iti CDA, wenno saan. Ngem no agregister daytoy, mailaksid daytoy iti panagbayad ti buwis kas maysa a kooperatiba.

Daytoy tax exemption dagiti kooperatiba ti mayat nga insentibo tapno agregister ti BENECO iti CDA. Iti kasta, mabaelan na’t nalaka a presyo ti kuryente. Ngem, kaarruba, adda manen ti singasing iti Kongreso a maikkat ti tax exemption ti kooperatiba, karkaro iti Value Added Tax. Isu daytoy ti prinotestaran ti naduma-duma a grupo ti kooperatiba a nairaman iti Cordillera Administrative Region Cooperative Union (CARCU).

Inton agbalin a pudpudno a non-stock, non-profit daytoy, saan a maibingay ti “maganansya” kadagiti miyembro ta daytoy ket makita koma iti serbisyo. Nu agbalin daytoy nga stock coop, dagiti miyembro ket mangted ti share capital da ket daytoy ti basaran ti dividends, ti patronage refund ket agbasar iti konsumo ti tunggal miyembro.

Ngem agdependar amin dagitoy iti desisyon ti “50% + 1” ti kabuklan a miyembro. Iti kaso ti BENECO, daytoy ket 53,000 a tattao ta ti kabuklan a miyembrona daytoy ket ngan-ngani 103,000. Masapol nga adda’t adu a voting centers inton umay ti referendum mainaig iti conversion ti BENECO tapno saan a masayang ti bannog dagiti apan agbotos kas idi napalabas a referendum iti conversion.

Nu saan nga agbalin a kooperatiba daytoy, mabalin a magatang dagiti pribado a kapitalista iti kuryente iti uneg ti lima a tawen manipud idi June 2001, kuna manen ti CDA nga opisyal.

Kasano ngay daytoy, kaarruba? Masapol a panunuten a nalaing dagiti miyembro ti BENECO daytoy. Ngem, masapol nga agisayangkat ti BENECO, CDA ken naduma-duma a grupo dagiti konsyumer ti naan-anay nga information campaign panggep iti conversion issue tapno ammo dagiti umili nu anya ti pagpanunutanda.

Siak, kaarruba, ket agbasbasa ak pay ti naduma-duma a pagiwarnak mainaig iti electric power, iti cooperatives ken naduma-duma a related literature. Ti panangkitak, dakkel unay ti maaramidan ti tunggal miyembro nu ammoda dagiti pagpilianda. Informed option, kuna ti maysa a propesyonal.

“Diak maawatan,” kuna ti maysa a kaaruba, “ti ammok ket namin-ano a ngimmato ti presyo ti kuryente.”

Isu ngarud a kasapulan nga ipaadal iti ad-adu dagitoy isyu mainaig iti conversion ti BENECO. #

Home > Op-ed | Back to top