Ni BRENDA S. DACPANO
www.nordis.net

Inspirasyon daytoy a putahe ti Vietnamese pho wenno noodle soup. Insuro daytoy (kagiddan ti dadduma pay a putahe) kaniak ti maysa a Vietnamese a naam-ammok.

Ramen:
4 parya, dadakkel
½ kilo a giniling a karne ti baboy wenno baka
1 sibuyas, naiwa iti pino (tinadtad)
200 gramo a sotanghon
¼ kilo nga uong (uray ania a klase)
Bawang, naiwa iti pino
2 kutsara a mantika
1 ½ litro naglambongan ti tultulang (baka/baboy)
Asin ken paminta a pangtimpla

Preparasayon:

1. Iyuper ti sotanghon iti danum nga apag-anam-am. No naluknengen, kartiben iti agarup dua-pulgada kaatiddog dagiti noodles. Paik-ikan ken ipaigid pay.

2. Iti dakkel a malukong, ikabil ti giniling a karne, tinadtad a sibuyas ken bawang (mangireserba ti bawang ken sibuyas a panggisa). Ilaok met ditoy ti kaguddua ti uong a tinadtad iti pino. Kasta met nga ilaok dagiti noodles. Timplaan ti maysa a kutsarita nga asin ken maysa a kutsarita a paminta.

3. Bugguan ken iwaen ti paria iti pabaribar iti kaatiddog a dua a pulgada. Ikkaten dagiti bukel na. Iseksek ditoy ti mixture ti karne ken noodles. Sedseden tapno saan a rumuar ti linaon na intono ipaburek. Uliten daytoy agingga napaseksekan amin a paria.

4. Iti dakkel a kaserola, igisa iti mantika ti bawang ken sibuyas. Isaruno nga ikabil ti nabati nga uuong. Kiwaren. Ikabil ti maysa ket kaguddua a litro a naglambongan ti tultulang ti baka wenno baboy. Bay-an nga agburek. Intono nagburek, pakapsoten ti apuy na ken timplaan iti asin ken paminta. Ipisok ditoy dagiti napaseksekan a paria. Iluto iti nakapsot nga apuy iti 15-20 minutos. Idasar a napudot a kagiddan ti innapuy.#

Para iti saludsod, komentaryo wenno singasing, mangipatulod ditoy makan.nordis@gmail.com