Pumigpigsa a tignayan ti mannalon

2 MIN READ

By MARY LOU MARIGZA
www.nordis.net

CABUGAO, Ilocos Sur — Iti maikawalo a Kongreso ti Solidarity of Peasants against Exploitation (STOP Exploitation), inwaraga-wag da dagiti balligi iti organisasyon ken pulitika iti unos ti dua a tawen.

Iti organisasyon, nakaisa-yangkat da ti innem (6) nga asembliya dagiti mannalon iti tukad munisipyo iti tallo a probinsya. Nabuangay ti Panagkaykaysa dagiti Man-nalon ti Naguilian (PAMANA) a kabarbaro a kameng ti organisasyon idi Pebrero 2011.

Iti agdama, 17 organi-sasyon ti naipauneg iti STOP Exploitation. Naiwayat met dagiti miting dagiti komite ken council of leaders iti uneg ti grupo.

Iti tay-ak ti panagdur-as ti kaammuan, naisayangkat dagiti innadal kadagiti kurso ken agdama a kasasaad. Naiyaramid dagiti innadal panggep iti isyu ti kinatalged ti taraon ken kinangina ti petrolyo iti namin-walo a daras.

Naisayangkat iti tsapter iti La Union ken Ilocos ti innadal iti House Bill 3059 wenno Genuine Agrarian Reform Bill (GARB). Nagurnong ti organisasyon kadagiti datos panggep iti gastos iti produksyon ti tabako, irik, mani ken mais tapno makapagbukel ti rumbeng a kadawatan a presyo dagitoy a produkto.

Naisayangkat met dagiti innadal iti pangtao a karbengan iti sakup ti TUKB, ALCUMPAC, PAGAY ken TIMEK-LU. Naiya-ramid met dagiti innadal iti Disaster Management Orientation kadagiti barangay a nalaka a madidigra iti tulong ti Ilocos Center for Research, Empowerment and Development (ICRED) ken Katinnulong Daguiti Umili iti Amianan a Luzon (KADUAMI).

Nagisayangkat met ti organisasyon kadagiti kam-panya basar iti kabaelan. Adda panggep dagitoy a pagsayaatan iti pangkabiagan ken pulitika. Sinagid dagitoy dagiti isyu ti nreporma iti daga, pannakalab-sing ti pangtao a karbengan ken kontra-umili a pulitika.

Ti pannakaburak ti mono-polyo ti panagtagikua ti daga ti kangrunaan a lalaunen ti kampanya para iti pudpudno a reporma iti daga. Naiyaramid daytoy kangrunaan babaen ti edukasyon ken propaganda.

Nakipagpaset pay ti sumagmamano a lider mannalon ti Ilocos Sur ken La Union iti pananglagip ti Mendiola massacre idiay Manila idi Enero 2010 ken 2011.

Kadagiti natitibker a tsapter, iruprupir da ti pannakaibaba ti abang ti daga ken interes ti utang. Adda dagiti positibo a resulta daytoy numan pay saan a nasaknap.

Tinawen a naisayangkat ti kampanya para iti pannakaingato ti presyo ti bulong ti tabako. Gapu ditoy nagun-od idi 2010 ti P85 iti Ilocos Sur, P80 iti La Union ken P78 iti Ilocos Norte.

Nababbaba daytoy ngem iti kadawatan a P95. Ita a tawen, P128 nga awan klasipikasyon ti kadawatan dagiti mannalon.

Naituloy met ti kampanya para iti pannakaingato ti presyo ti irik ken pannakaibaba ti presyo ti bagas.

Numan pay awan ti nalawag a balligi ditoy, napauneg ti panagawat dagiti mannalon pangep ti isyu.

Insayangkat met dagiti tsapter iti abagatan a paset ti Ilocos Sur ti kampanya iti pannakaingato ti presyo ti mani.

Naiwayat met ti kampanya para iti pangtao a karbengan. Nakipagpaset ti STOP Exploitation iti kampanya nga elektoral. Sinuportaran ti organisasyon ti kandidatura dagiti lider mannalon ken dadduma pay nga alyado a pulitiko.

Kangrunaan met a pinaset ti organisasyon ti kampanya kontra iti RP-US Balikatan 2010 a naisayangkat iti Ilocos region. Malaksid ditoy, nagposisyon met ti grupo iti panangpadisi kenni GMArroyo.

Pinaannayas ti STOP Exploitation ti pangdawat iti proyekto a sosyo-ekonomiko ken timmulong iti relief operations iti didigra a Bagyo Pepeng ken Juan. Inkari da nga iti umay a dua a tawen ket itultuloy da a paaduen ti kamkameng ken palawaen ti sakup ti organisasyon. # nordis.net