Ni BRENDA S. DACPANO
www.nordis.net

Kadawyan nga ensalada a patatas ti itugot ko kadagiti potluck party. Nalaka ngamin daytoy nga aramiden ken mabalin nga isagana uray maysa nga aldaw sakbay iti party.

Pinakan ko ti ensalada a salad ti Amerikano a bisita mi idi ket nagustuan na met. Sabali kano daytoy nga ensalada kaniana ngem naimas.

Ramen:
2 kilo a patatas
½ kilo a carrots
½ kilo a manok, barukong
½ kilo a celery, ungkay
200 gramo a pasas
800 ml. a mayonnaise
200 gramo a keso
Sanga-pirit nga asin ken paminta

Preparasyon:

1. Bugguan dagiti patatas. No agusar ti dadakkel, ukisan. No agusar kadagiti kasla bolintik, bugguan a naimbag.

2. Bugguan ken ukisan dagiti carrots.

3. Ilambong dagiti patatas ken carrots aginggana nalukneng wenno fork tender wenno no itudok ti tinidor ket nalaka a tuduken ngem saan met unay a nalukneng. Timplaan ti sanga-pirit nga asin ti paglambongan ti patatas. Paik-ikan ken pabaawan.

4. No agusar ti dadakkel a patatas, iwaen iti pakwadrado a sagkakaguddua pulgada. Kasta met ti aramiden kadagiti carrots.

5. Ilambong ti barukong ti manok iti danum nga addaan asin, paminta, bawang ken sibuyas. Adawen no naluton. Usaren ti naglambongan a pangkaldo wenno sopas. Pabaawan ti karne ti manok tapno nalaklaka a persa-persayen.

6. Bugguan dagiti ungkay ti celery ken iwaen a pabaribar iti agarup kaguddua pulgada.

7. Iwaen met iti babassit a pakwadrado ti keso.

8. Iti dakkel a malukong, paglalaoken amin a ramen. Kiwaren. Ikabil iti pangipaknian a makaluban santo ipalammiis. # makan.nordis@gmail.com