Ni BRENDA S. DACPANO

Paborito ti kaaduan ti barbecue, uray ania a klase… sibubukel a manok, nailgat iti naingpis a karne, lames wenno nateng. Ti sekreto ti nananam a bbq ket adda iti sarsa, pangiyuperan wenno dadduma pay a maisapsapo ken maipulagid ditoy.

Padasen yo dagiti sumaganad ta bareng no magustuan yo.

Sweet-Spicy sauce
(3 tasa ti pakaaramidan na)
1 ½ tasa ketsap
¼ tasa suka
½ tasa asukar a brown
2 kutsara curry powder
1 kutsara Worcestershire sauce
1-1 ½ kutsarita bawang, tinadtad
1 kutsarita nga asin
1 kutsarita a paminta, narumek

Paglauken amin a ramen iti dakkel a malukong, kiwaren. Kaluban ken bay-an iti 30 a minutos wenno ikabil iti refrigerator agingga 5 nga aldaw tapno aglaok ti raman na. Ipulagid iti karne wenno lames bayat a maituntuno. Usaren a pangipunas/pangipulagid ti bbq brush, nanarnar nga ubbak ti saba wenno rigis a cotton a naigalot iti maysa nga ungto ti ruting.

Mangga-sili sarsa
(2 ½ tasa ti pakaaramidan na)
2 tasa nalabaga a bell pepper, naiwa iti napino
½ tasa sibuyas, tinadtad
2 kutsara a mantika
2 mangga, saan unay a naluom, naukisan, naibukelan ken tinadtad
¼ tasa asukar a brown
2 kutsara a suka
½ kutsarita sili a nagasang, narim-it
¼ kutsarita nga asin
2 kutsara bulong ti sibuyas, naiwa iti napino

Iluto ti bell pepper ken sibuyas iti napudot a mantika aginggana lumammuyot. Ilaok dagiti nabati a ramen. Pagbureken santo ipakapsut ti apuy ti dalikan. Ipaburek iti 10 a minutos wenno aginggana nalammuyot ti mangga. Pabaawan.

Gilingen iti blender, food processor wenno paggilingan a de-mano. Ilaok ti bulong ti sibuyas. Ipulagid iti bbq brush iti karne wenno manok.

Sarsa Tips:

1. No agusar ti sarsa a maipunas iti bbq bayat nga ituntuno daytoy, agarup 4 a kutsara a sarsa ti mausar iti tunggal guddua kilo a karne.

2. No usaren ti sarsa a sawsawan, mangisagana ti 2 agingga 3 a kutsara a sarsa iti tunggal tao.

3. Ti nasam-it a kas dagiti asukar, diru ken sinam-it a prutas ket nalaka a makset isu nga ikabil laeng ti sarsa iti maudi a 10 minutos iti panagtuno.

Lemon ken bawang marinada
(½ a tasa ti pakaaramidan na)
¼ tasa a mantika
1 kutsarita nga ukis ti lemon, naiwa iti napino wenno ginadgad
¼ tasa a juice ti lemon
1 kutsara a parsley, celery wenno kinchay (1 kutsarita no nagango ti usaren)
2 kutsarita a bawang, tinadtad
½ kutsarita a paminta, narumek

Paglauken amin a ramen, ikiwar tapno aglaok ti raman dagiti ramen. Mabalinen a pangiyuperan ti karne ti baka, baboy wenno manok iti 2 agingga 4 nga oras sakbay nga ituno. Ikabil iti refrigerator wenno iti nalamiis a lugar. Paik-ikan ti karne sakbay nga ituno. Ireserba ti marinada nga ipunas babaen iti brush bayat iti panagtuno

Laya ken rum marinada
(1 tasa ti pakaaramidan na)
½ tasa juice ti pinya
1/3 tasa rum
¼ tasa soy sauce
1 kutsara nga asukar a brown
1 kutsara a laya, ginadgad
1 kutsarita a bawang, tinadtad
¼ kutsarita a sili pulbos

Paglalauken dagiti ramen iti maysa a malukong. Iyuper ditoy ti karne (baka, baboy, manok), ikabil iti refrigerator iti 4 agingga 24 oras. Paik-ikan ti karne, ireserba ti marinada. Ipunas iti ituntuno a karne ti inreserba a marinada.

Marinada tips:

1. Agusar ti 1/3 agingga ½ a tasa a marinada iti tunggal guddua kilo a karne.

2. Tapno maiyuper a naimbag ti karne ken mabibiit ti aglinis, ikabil ti marinada iti napuskol a plastic bag (maymayat no resealable). Serraan ti plastik ken ikabil iti malukong. Ikabil iti uneg ti refrigerator. Sagpaminsan a balikiden tapno maiyuper amin a paset ti karne.

3. Nasken nga ikabil ti maiyup-uper a karne iti refrigerator saan nga iti room temperature tapno saan nga agparnuay ti bakterya.

4. Gaputa ti marinada ket nangiyuperan ti naata a karne, ibelleng ti sobra. No i-brush daytoy iti ituntuno, ikabil iti umuna a paset ti panagtuno. Masapul a maluto ti karne wenno manok iti agarup 10 minutos kalpasan ti maudi a pannakaipulagid ti marinada. No usaren ti marinada a sawsawan, ipaburek daytoy iti 5 a minutos. #