Dagiti nasustansya a taraon

Panagpasuso

Maiyallukoy ti panagpasuso ti ina ngem iti panagpasuso iti botelya gapu ta ket mas superyor.

Pasusuen a dagus ti maladaga apaman a maipasngay. Ti panagpasuso a dagus iti maladaga ket makatulong iti panagpatubbog iti a gatas. Maikkan iti gundaway ti maladga a masusuna ti umuna a tubbog ti suso iti inana a colostrum.

Ti colustrum ket isu ti umuna, napalet, dumuyaw a gatas nga aggapu iti suso ti ina kalpasan a nangipasngay. Napateg daytoy gapu ta aglaon iti sustansya a manglaban iti sakit.

Ti ina ket masapul a mangan kadgiti nasustansya a taraon ken uminum iti adu a danum ken digo tapno mapaadu ti tubbog ti suso na.

1. Dagiti bentahe ti panagpasuso ti ina
a) Nasaysayaat a pasusuen ti maladaga manipud iti ina gapu ta nakasaganan ken nalaka.
b) Nadalus ken husto ti temperatura na.
c) Ti gatas ket aglaon ti sustansya mangted-salaknib iti maladaga laban iti sakit.
d) Basbassit ti parikut kas iti panagtakki, panagtabbel, panagsarwa ken allergies a mapasamak no gatas ti ina ti ipasuso.
e) Asideg ti rikna dagiti gina gaputa agassideg dagiti bagi da bayat iti panagsuso.
f) Ti panagpasuso ti ina ket pangpababa iti peggad a maaddaan iti kanser ti suso.

2. Dagiti pagdaksan ti panagpasuso iti botelya/gatas a nailata

Ti panagpasuso iti botelya iti gatas a pulbos, ebaporada wenno kondensada ket saan a maiyallukoy. Mausar koma laeng daytoy a pangnayon no saan nga umanay ti gatas ti ina.

Nangina unay daytoy a gatas tapno punuan ti kasapulan ti maladaga. Ti gatas ti baka ket saan a kanayon nga adda.

Nalaklaka a magatelan ken agtakki ti maladaga kadagitoy a gatas. Mabalin a makaala ditoy ti maladaga iti allergies ken panagtakki.

Kasapulan iti naan-anay wenno naannad a panangisagana ti gatas gapu iti peggad a makausar ti kontaminado a botelya ken tsupon.

3. Dagiti addang iti panagpasuso ti ina

a) Dalusan a nalaing ti suso iti danum ken sabon sakbay nga agpasuso.
b) Iggaman ti suso ken in-innayaden a piselen ti mungay.
c) In-innayaden a masahien ti suso nga agturong iti mungay tapno makatulong iti panagtedted ti gatas.

4. Dagiti addang iti panagpasuso iti botelya

a) Buguan dagiti im-ima iti sabon ken danum sakbay nga isagana ti gatas.
b) Ipaburek ti botelya ken tsupon iti 15 a minuto sakbay nga usaren.
c) Ipaburek ti danum nga ilaok iti gatas iti agarup 15 a minuto.
d) Ilaok iti maysa a rukod iti pulbos a gatas iti maysa nga onsa ti danum.
e) No ti usaren ket gatas nga ebaporada, paglauken ti maysa a rukod ti gatas iti maysa a rukod a danum ken nayunan iti maysa a kutsarita nga asukar.
f) Saan nga usaren ti tsupon a natinnag iti daga wenno datar.#