Ni BRENDA S. DACPANO
www.nordis.net

Ti pinangat ket inlambong nga ikan a natimplaan ti asin ken paminta. Idiay Quezon, nilaga ti awag da ditoy. Ngem no ditoy rehiyon, malaukan ti naalsem a kas ti pias, kamatis wenno perres.

Adu ti mabalin nga ipangat nga ikan. Naimas a pangpangat ti suka ngem no panawen a nalaka ken adu ti kamatis mayat nga agusar kadagiti adda iti panawen a pangalsem. Adun ti pias itatta isu a daytoy ti inusar ko. Gapu ta adu ken nalaka tatta ti lasona, mayat a kumbinasyonan daytoy ti caramelized wenno nailuto iti bassit a mantika, asin ken asukar.

Ramen:

kilo a besugo (wenno aniaman nga ikan/lames)
-15 pidaso a pias
1 pulgada a laya
Bulong ti sibuyas
-5 pidaso a sili a berde
Patis ken asin a pangtimpla
1 tasa a danum

Preparasyon:

1. Siksikan ken ibagisan dagiti ikan. Bugguan.

2. Bugguan ken gudduaen a paatiddog dagiti pias.

3. Ukisan ken iwaen iti naingpis ti laya.

4. Bugguan ken iwaen iti maysa a pulgada ti bulong ti sibuyas.

5. Ipisok amin dagiti ramen iti napuskol a kaserola wenno banga. Bukbukan ti maysa tasa a danum santo kaluban. Ipaburek iti kalalaingan na nga apuy iti 10 agingga 20 a minutos wenno aginggana maluto dagiti ikan.

6. Caramelized lasona: ukisan dagiti lasona, iluto a sibubukel iti maysa kutsara a mantika, maysa kutsara nga asukar, sangapirit nga asin ken paminta. Kiwaren aginggana marunaw ti asukar. Adawen. Naimas nga ipares iti pinangat, pinirito wenno tinuno.# nordis.net

For comments, please email makan.nordis@gmail.com