2 MIN READ

Ni BRENDA S. DACPANO
www.nordis.net

Simmikat ti tempura idiay Japan ngem daytoy ket inyam-ammo kadakuada dagiti Portuguese a missionaries ken komersyante idi katengngaan ti maika-16 a siglo.

Ti tempura ket maysa a klase ti luto a maisawsaw ti ikan/lames wenno nateng iti batter (arina a naikanaw iti nalamiis a danum wenno sparkling water) ken maiprito (dip fry).

Okra ti paborito a nateng ti maysa a gayyem ko nga adda idiay California, ni Manang Ruby Estantino Acebuche. Dawat na kaniak ti nadumaduma a luto ti okra. Kangrunaan a paboritok a luto ti okra paksiw. Daytoy diay mabugguongan, maikkan ti bawang santo malaukan ti suka no dandanin maluto ti okra.

Ti okra ket mayat met nga aramiden a tempura. Adu pay a nateng ti mabalin nga iluto iti kastoy kas dagiti sabong ti karabasa, bulong ti balangeg (crispy kangkong), bulong ti sayote, carrots, cauliflower, kdpy. Naimas met nga aramiden a tempura ti pasayan ken ikan/lames

Tempura batter:

1 & 1/4 cup all-purpose flour
1 & 1/4 tasa nalamiis a danum, beer wenno sparkling water (soda water)
2 nga itlog
sangapirit nga asin ken paminta

Runawen ti arina iti danum wenno beer, ipettak ken ikiwar ditoy ti itlog. Ilaok ti asin ken paminta. Ditoy nga isawsaw dagiti nateng wenno ikan. Ipisok a saggaysa iti napudot a mantika.

No ti batter ket malaokan ti beer imbes a danum laeng ken manayunan pay ti itlog, uray saanen nga ikkan ti baking powder. Ti beer ken itlog ti agserbi a pampa-alsa gapu ta nalabutab dagitoy. Kitaen ti sabali a bersyon ti tempura iti Nordis idi September 6, 2009 wenno suruten daytoy a link. # nordis.net