Makan a la Pinoy: Seafood dining

August 30, 2010 in Featured, food

By BRENDA SUBIDO-DACPANO
www.nordis.net

Maysa nga ipanpannakkel a seafood restaurant ti Pangasinan ti Matutina. Maysa daytoy a paborito a panganan dagiti agbibiyahe ditoy a paset ti Luzon. Iti naminsan a papan ko idiay Urdaneta kaduak dagiti ka-batch ko idi hayskul ket pinadas mi a napan nangan iti branch da idiay Nancayasan.

Adobong pusit.

Nagorder kami ti sari-saring seafood sinigang, crispy hipon, sari-saring inihaw, adobong pusit ken steamed vegetables. Adda bunbuntog na bassit ti panangala ti waiter iti order mi uray pay saan met unay a napunno ti restaurant iti kustomer. No pay kasta, saan mi a nadlaw unay ta adu kami nga agpapatang.

Kalalaingan na ti pannakaluto ti pusit nga adobo ken mayat ti timpla na. Naimas ti alsem ti sinigang a seafoods a blue marlin, rasa, padaw, kappo ken pusit ngem nasobraan ti luto na diay pusit ken kappo ta medyo nakulbet. Nalaukan daytoy ti balangeg. Nasayaat koma a sada la ipaburek dagiti seafoods no idasar dan. Kasla nabayagen a naiyuper dagiti seafoods iti digo ti sinigang.

Sari-saring inihaw.

Nasarangsang a talaga ‘tay crispy hipon. Apag-isu ti pannakaluto dagiti nateng, adda met pagpilian a siwsiwan a ginisa nga aramang wenno digo ti bugguong a munamon a naperresan ti kalamansi.

Ti sari-saring inihaw ket naimas met, isu laaeng ta saan met a tinuno diay okra no ti ket inlambong. Maymayat koma no naituno met diay okra. Nasobraan ti pannakatuno na diay bangus isu a nagmaga. Nagustuak ti pannakatuno diay tarong ken porkchop.