Ni BRENDA S. DACPANO

Nalaka ti kamatis ita. Magatang iti 10 pisos kada kilo wenno kada atado. No maranaan pay dagiti aglaklako no sumipnget ilako da iti “presyo ti agawid” wenno ‘tay “paibus” a kuna da a lima pisos kada kilo. Idiay Pangasinan, 3 pisos ti maysa kilo.

Adu ti mabalin a pamay-an iti kamatis tapno maipreseba daytoy. Maysa ditoy ti sinam-it (tomato jam) a palaman iti pandesal wenno tinapay wenno kas dessert. Mabalin met nga ilako daytoy no adu ti aramiden yo. Masapul laeng a maisterilisa dagiti usaren a garapon tapno maipreserba iti nabaybayag.

Pilien dagiti kamatis a napuskol ti lasag na ken ‘tay saan unay a nabukel (plum wenno salad tomato) tapno adu ti pakaaramidan na.

Ramen:

1 ½ agingga 2 kilo a kamatis
½ agingga ¾ kilo nga asukar, brown
juice ti 1 a lemon wenno 2 a kalamansi
½ kutsarita a cinnamon, pulbos (inayon segun no kayat yo)

Preparasyon:

1. Agpaburek ti danum. Itapog ditoy dagiti kamatis iti agarup 30 segundos agingga 1 minutos, segun iti kinapuskol ti ukis ti kamatis. Adawen ken ikabil iti nalamiis a danum. Ukisan ken ibukelan dagiti kamatis santo iwaen iti babassit.

2. Ikabil iti paglutuan (saan nga aluminum) dagiti naisagana a kamatis. Ilaok ti juice ti lemon wenno kalamansi ken cinnamon. Pagbureken.

3. Ilaok ti asukar. Kiwaren aginggana marunaw ti asukar. Ipaburek iti kalalaingan na nga apuy ken kiwaren iti sagpaminsan aginggana napalet ti digo na. Mabalinen nga ikabil iti garapon nga isterilisado. #