Ni BRENDA S. DACPANO
www.nordis.net

LUMPIA a nabalkot ti rice paper

Adda ti nagayyem ko a Vietnamese ket tunggal agkita kami idi ti tungtonganmi ket maipanggep iti makan. Isuna ti nangisuro kaniak no kasano ti mangan ti sapsap nga usar ti chopsticks. Istoryaenna no kasano nga aramiden a sopas dagiti tedtedda a makan ken dagiti kankanen da idiay Vietnam. Sinuruannak pay no kasano ti panagaramid ti rice paper.

Adu a klase ti pagbalkot iti lumpia: wanton wrapper, lumpia wrapper, egg wrapper. Ti rice wrapper ket kadawyan nga us-usaren dagiti Vietnamese. Ti rice wrapper naaramid manipud iti arina ti bagas, danum ken asin, ken kadawyan a nagtimbukel. Daytoy ket kasla papel, namaga ken nasarangsang. Kasapulan a maiyuper iti napudot bassit a danum iti agarup 20 segundo sakbay a mabalin nga usaren a pagbalkot.

Adda met magatang a rice wrapper kadagiti lokal a supermarket. Inton maminsan tayo a talantanen no kasano ti panagaramid ti rice paper wrapper.

Ramen ti peanut sauce:
1 tasa a peanut sauce, mabalin nga agusar ti peanut butter ngem nasam-it unay daytoy.
1/4 tasa a danum
asin ken paminta a pangtimpla
Ikabil iti kaserola ti amin a ramen ti sauce, ipapudot daytoy agingga aglaok dagiti ramen. Adawen.
Ramen ti sweet-sour sauce:
1/4 tasa a gawgaw
3 tasa a danum
2-4 kutsara a suka
1/4-1/2 tasa a brown sugar
soy, asin ken paminta a pangtimpla
Ikanaw ti gawgaw iti danum. Inayon ti dadduma a ramen. Iluto iti kalalaingan na nga apoy. Kiwaren aginggana napalet. No napalet unay, nayunan ti bassit a danum.

Parabaw:
narim-it a kinirog a mani
bawang a tinadtad
Ramen ti ipalaman :
1 ulo a litsugas, naiwa iti paatiddog
1 sibuyas wenno leeks, naiwa iti naingpis
1/4 kilo a mongo sprout
2-3 pidaso a carrots
200 gramos a sotanghon
mabalin nga agusar iti solo wenno kumbinasyon dagiti sumaganad: manok, karne ti baboy, lames wenno pasayan.

Preparasyon:
1. Timplaan ti asin, paminta wenno ‘tay timpla a pangbarbecue ti manok wenno baboy sakbay nga iprito wenno ituno. No agusar ti pasayan, ukisan dagitoy, timplaan ti asin ken paminta sakbay nga ituno wenno ikirog iti apagbiit. No agusar ti ikan, mabalin met laeng ti tinuno wenno naprito ngem nasken nga ikkaten dagiti siitna.
2. No nabaawanen ti karne, iwaen iti naingpis a paatiddog. Ipaigid pay.
3. Bugguan dagiti natnateng. Ukisan dagiti carrots ken iwaen iti kasla atiddog a naingpis. Iwaen met laeng iti paatiddog a naingpis ti litsugas kasta met ti leeks wenno sibuyas.
4. Mabalin a kasdiaynan ti mongo sprout wenno dilnakan ti napudot a danum, paik-ikan kalpasan ti 10 a segundo.
5. Dilnakan met laeng iti napudot a danum ti sotanghon. Paik-ikan a dagus.
6. Isagana ti maysa malukong a napudot bassit a danum. Daytoy ti pangitabsawan ti rice wrapper iti 20 segundo. Saan a baybayagen nga iyuper tapno saan a marunaw ti wrapper.
7. Ikabil ti nabasa a wrapper iti pinggan, mangikabil iti saggabassit ti amin a ramen. Ikkan ti 1-2 kutsara a sauce. Ibalkot ti wrapper.
8. Parabawan ti sweet-sour sauce ken warakiwakan ti mani ken bawang.# nordis.net