Ti panagkissiw ket ti napalalo ken saan a matengngel a panaggutad ti bagi. Dagitoy a kaso ket agtulid-tulid dagiti mata, nakamuttaleng, ken saan nga ammo ti pasyente ti mapaspasamak.

Ti panagkissiw ket gapu iti parikut ti utek. Kadagiti ubbing, ti kadawyan a gapu ti kissiw ket nangato a gurigor ken nakaro a pannakamaga ti bagi. Kadagiti nakaro unay ti sakitna a tao, ti gapu ti kissiw ket mabalin a tetano, meninghitis, malarya iti utek wenno pannakasabidong. Ti tao a masansan nga aggutad-gutad ti bagina ket mabalin nga addaan epilepsy.

Ania ti aramiden no ti tao ket agkissiw?

Saan a palubusan a dangranna ti bagina. Ikkaten wenno iyadayo amin a natangken wenno natadem a bambanag. Tingalan ti ngiwatna ti kayo wenno kutsara a nabalkot iti nadalus a lupot tapno malapdan ii pannakakagat ti dilana. Ikkaten ti kanen wenno anyaman a nabati iti uneg ti ngiwat na, tapno saan a mabaraan ti panaganges na.

a. No nangato ti gurigor na, dagus a banyusan ti nalamiis a danum wenno ti danum a nalaukan ti asin, tapno makissayan ti kinabara ti bagi.
b. Saan a pakanen wenno painumen no madama iti panagkissiwna.
c. Kalpasan ti panagkissiwna mabalin a makaturturog. Bay-an a maturog ti masakit.
d. No nagebbal ti bagina (edema) ken siririing, painumen kada agsardeng ti panagkissiwna.
e. No adda dagiti sinyal ti tetano, meninghitis, malarya ti utek wenno pannakasabidong wenno ti panagkissiw ket masansan, ipakita a dagus iti doktor tapno maammuan ti gapu ti panagkissiwna. #