Ni BRENDA SUBIDO-DACPANO
www.nordis.net

PIKNIK KEN PANAGBURAKTI RAMA. Naragsak dagiti pamilya a pagpiknik ken naglugan iti raket iti karayan ti Aringay, La Union. Ti pamilya Abellera (manipud iti kannigid): Zardi, Phil, Tommy, Gino ken ni Gina. Photo by Brenda S. Dacpano

Naipakat ti rama ti kasinsin ni lakay tallo a bulan sakbay iti panagburak idi napan a Domingo. Tallo a reppet a remmeng ti naipakat iti pagat-barukong a kaadalem ti karayan iti dayaen ti rangtang ti Aringay.

Kayatko a kamakamen ti panagburak ti rama ngem nangaton ti init idi makadanon kami iti igid ti karayan. Adu pay met gamin a dakiwas iti balay, adu pay a dinagas iti tiendaan sakbay a nakadanon iti pagpiknikan.

Dagiti remmeng a maipakat iti karayan ti agbalin a balay dagiti lames, pasayan, kappi ken dadduma pay a biag iti karayan. Maaladan ti aglawlaw dagiti naipakat a remmeng tapno saan a makuti. Kalpasan ti sumagmamano a bulan mabalinen a sangaten dagiti rama. Iti panagsangat, agusar ti iket tapno saan a makabulos dagiti lames.

Nasangpetanmi dagiti ubbing a nakalugan iti raket (bamboo raft) iti tengnga ti karayan. Naragsakda nga aggagantil bayat a dagiti nagannakda ti mangidurduron iti raket.

Iti kalapaw, madama ti panagimuri ti pokpoklo ken ar-arosep. Agiw-iwa met ti kamatis ti maysa a kaanakan ni lakay.
Ti pardas ni lakay a nangisimpa ti pagtunuan. Naladaw kami a simmangpet ket dakami pay ti naitulag a mangitugot ti pagtunuan ken uging. Napan kami pay dimmagas ti karne ti baboy idiay tiendaan napia la maituno a nayon ti nasangatan. Gimmatang met ni ipagko ti ituno a tarong ken dadakkel a bulilit.

Pasayan, kappi, bagsang, tilapia ken bunog wenno bukto. Dagitoy ti nasangatan iti karayan.

Naikirog dagiti pasayan. Ti dadduma ket naaramid a kilawen a naalseman ti kinuskos a naata a mangga. Apo unayen…makapakatay ti langa na! Saanko a nateppelan ti bagik nga insida a nangpidot iti pangramanan. Dagiti bunog, bagsang ken tilapia ket nailuto iti naata a mangga. Naiyap-ap iti pariok dagiti nailgat a mangga santo naiparabaw ditoy dagiti lames. Natimplaan laeng iti asin, naimas ta kimmagat ti alsemna. Dagiti kappi a nakirog ket nagpula, naimas nga isawsaw iti suka nga adda silina.

Simple laeng dagitoy a taraon ken nalabit a kadawyan a maraman dagiti adda iti aw-away ngem kas kadakami nga agnanaeden iti syudad kailiwmi unay dagitoy.

Idi nalpas ti kaan, timmabsaw manen iti karayan dagiti ubbing. Naglulubbunan-da ti raket.# nordis.net