By LESLIE VALDEZ and JOEMARK RAMISCAL
www.nordis.net

POLITICS OF CHANGE. Women of Benguet at the stage performing a skit during the Cordillera Day program in La Trinidad, Benguet; promoting unity and change. Photo by Aldwin Quitasol

LA TRINIDAD, Benguet — Naisayangkat idi Abril 10 ti maysa a programa idiay Cordillera Career Development College (CCDC), La Trinidad, iti probinsiya ti Benguet, ti panangselebrar iti Cordillera Day 2010.

Ti tema ti selebrasyon ket “Palawaen ti Panagkaykaysa, Itandudo ti Pudno a Pulitika, Kabenguetan, Sumikad ka!” Nagbayag iti agarup sangapulo nga oras ti programa nga impangrunaan ti Katribu Partylist.

Iti nasao a programa, adda ti tallo nga agenda kas iti panangiwarnak iti umisu nga panangusar ti baro a sistema ti panagbutos, plataporma a kayat da a maipatungpal iti bukod da a probinsiya ti Benguet ken ti pagilian a Pilipinas, karaman payen iti panagkampanya ti Katribu Partylist ken panangikampanya kadagiti dua nga agpaidasig a senador a da Liza Maza ken Satur Ocampo. Naiballa-ballaet dagiti kankanta, pattong ken panagsuro ti campaign jingles.

Imbingay ni Engr. Virgilio M. Aniceto, maika-5 a Katribu nominee, iti nasao a programa ti panangipakita ti panag-kaykaysa ti Kabenguetan ken panangitandudo iti bukod da a karbengan. Babaen iti panangipabuya kadagiti ladawan ti Benguet iti agdama ken ti pursigido a pannakilaban ti umili tapno itakder ti kalintegan da, napagkaykaysa ti amin iti rumbeng a turongen iti masakbayan.
Naipakita ti kasasaad dagiti umili iti Itogon no sadino ket nabaknang iti balitok ngem ad-adda a dagiti kapitalista ti agnamnam-ay.

Naipakita ti agtultuloy a pannakilaban dagiti umili iti Mankayan tapno itakder ti karbengan da iti daga ken kinabaknang ti lugar a saan ketdi a ti panagrekka ti daga ken pannakadadael ti balbalay da. Naipabuya ti agdama a kasasaad dagiti gardinero ti natnateng a kanayon a sumangsango iti nababa a presyo ti mula da ngem nangina ti abono ken farm inputs. Naipabuya ti kasasaad dagiti napukawan ti balbalay gapu iti nagsasaruno a bagyo nga inggana ita ket awan pay pagakaran da.

Kas panangselebrar, nakipaset met dagiti nadumaduma a munisipalidad ti Benguet kas ti Kibungan, Kapangan, Atok, Mankayan ken Bakun. Dagiti nasao a munisipalidad ket nangipaay iti kabukbukodan da a kultural a presentasyon kas iti Tingguian takik ken pattong a kas panangipaduyakyak da iti panagyaman da bayat ti napasaran da iti didigra ni bagyo a Pepeng.

Iti maysa a paset ti programa, nagrupu-grupo da tapno pagtutungtongan no kasano ti kada munisipalidad a tumulong iti panangikampanya ti Katribu Partylist karaman payen da Liza Maza ken Satur Ocampo a mangidaulo idiay Senado ken no ania ti istratehiya da, a kas napagtutulagan da nga agbalay-balay da nga agkampanya.

Kalpasan ti programa, nag-motorcade dagiti timmabuno manipud ti CCDC a nagturong iti market. # nordis.net