Makan a la Pinoy: Pancake

Ni BRENDA S. DACPANO

Ti pancake wenno hotcake ket saan a tradisyunal a maidasar iti panganan ti kadawyan a Pilipino, saan a kas ti innapuy. Maysa a klase daytoy ti daplak a tinapay manipud iti batter (naglaok nga arina ken likido – danum, gatas, ken/wenno itlog – a mabalin a batilen wenno kiwaren) a mailuto iti napudot a griddle wenno pariok. Adu a klase ti pancake iti nadumaduma a lugar. Mayasping daytoy iti waffles.

Ti pancake ti England ket addaan tallo a ramen: arina, itlog, ken gatas. Nadaroy ti batter ken naingpis daytoy no maluto. Kadawyan a nasam-it a maparabawan ti lemon juice ken asukar, wenno pangbungon daytoy iti naluto a karne a kanen da kas main course. Kaingas na daytoy ti pancake ti France a maawagan ti crêpe (popular met iti Quebec ken Brazil), ken crespelle, cannelloni iti Italy. Iti Germany maawagan daytoy iti eierkuchen wenno pfannkuchen (maysa a tipo ti doughnut). Platschinken met ti awag da idiay Austria a kadawyan a mapalamanan ti apricot jam wenno chocolate sauce.

Iti U.S. maawagan daytoy ti pancake, hotcake, griddlecake, wenno flapjacks. Addaan ti ramen a pampa-alsa (raising agent: baking powder ken baking soda). Idiay Scotland ken Ireland maawagan ti drop cones wenno girdle cakes ti pancake da a kas timpla ti American pancake. Malaukan iti yeast ti pancake a pita iti Middle East. Iti India, ti pancake da ket dosa a maaramid manipud iti arina a bagas. Moo shu nga addaan green onions ken arina ti buckwheat iti China. Iti Egypt, katief, mapalamanan santo maikupin a kas ti empanada tayo ken mayuper iti sugar syrup.

Ditoy Pilipinas kas iti Mexico, kadawyan a maidasar ti pancake kas merienda wenno armusar. Maparabawan ti butter wenno margarina ken asukar wenno sugar syrup. Sumaganad ti kasapulan iti panangisana ti pancake:

Batter:
1 tasa arina, all-purpose
1 kutsarita baking powder
¼ kutsarita baking soda
sangapirit nga asin
1 kutsarita nga asukar
1 kutsara a butter, narunaw
1 tasa a gatas, buttermilk
1/4 tasa a gatas, skim milk
1 puraw ti itlog

Syrup:
1 tasa nga asukar a puraw
1/4 – 1/3 tasa a danum
juice ti 1 nga orange/lemon wenno 1 kalamansi

Panangisagana:
1. Sagaten ti arina ken dadduma pay a namaga a ramen iti dakkel a malukong. Paglauken dagiti gatas ken in-inut nga ilaok iti namaga a ramen. Apagbiit laeng ti panangkiwar tapno saan a natangken ti pancake.
2. Iti sabali a malukong batilen ti puraw ti itlog aging-gana nalabutab ken saanen a nadaroy. Inayon daytoy iti batter. Innayaden ti panangkiwar (fold-in) tapno na-alsa (fluffy) ken nalammuyot ti pancake.
3. Ipapudot ti non-stick pan, griddle wenno pariok iti kalalaingan na a pudot. Ikabil ti agarup guddua tasa a batter iti paglutuan. Balikiden daytoy inton bimtak ti labutab na iti rabaw. Ituloy nga iluto aginggana ag-amarilio bassit ti pancake. Adawen.
4. Idasar ti pancake a kabulon ti butter, sugar syrup wenno prutas a presko wenno nailuto iti asukar. Mabalin nga usaren ditoy ti saba, strawberries, oranges, raspberries, ken dadduma pay a prutas.
5. Syrup: Ikabil ti asukar iti kaserola. In-innayad nga ibukbok ti danum iti igid/aglawlaw iti asukar. Ipapudot aginggana nganngani agburek, pakapsuten ti pudot ti dalikan. Saan a kiwaren tapno saan nga ag-crystalize ti asukar. Inton nalitnaw ti syrup ikabil ti juice ti orange wenno kalamansi. Ikiwar santo adawen.

Tips:
1. Tapno nabibiit ti panagluto, isagana dagiti namaga a ramen sakbay iti aldaw ti panagluto. Mabalin nga agaramid iti adu, maysa agingga dua a kilo. Ikabil iti garapon wenno plastik a makaluban santo ipakni.
2. Gaputa nangina ti likido a gatas ken mabiit nga agbangles nangruna no saan a maikabil iti refrigerator, mabalin nga usaren ti gatas a pulbos (buttermilk, wholemilk, full cream, wenno skim milk). Ikanaw ti ¼ tasa a gatas a pulbos iti 1 ¼ tasa a danum.

Ti panagusar iti baking soda ket pang-neutralize iti acid nga adda iti gatas, saba, molasses (no agusar ken mailaok iti batter) ken dadduma pay a ramen a mailaok iti batter. No awan ti baking soda mabalin met a baking powder laeng ti usaren. Dua kutsarita a baking powder ti ilaok kada 1 tasa nga arina. #