Ni BRENDA SUBIDO-DACPANO
www.nordis.net

Tofu a naseksekan ti karne, maysa a Chinese inspired a putahe. Mabalin nga usaren a paseksek (stuffing) ti pasayan wenno ikan. Ti unusar ko ditoy ket giniling a karne ti baboy.

Ramen
3 a bloke tofu
mantika a pagprituan
1 ngipen a bawang
dua kutsara a tausi
1/4 kilo nga uong (button wenno shitaki)
bulong ti sibuyas
1/4 kutsarita a paminta
1 kutsara a gawgaw wenno cornstarch
Paseksek
1/4 kilo a giniling a karne ti baboy
1 ungkay ti celery, naiwa iti pino
1 sibuyas, naiwa iti pino
1 ngipen a bawang
1/2 kutsarita nga asin
1 kutsara nga asukar a brown
1/4 kutsarita a paminta a pulbos

Preparasyon
1. Isagana ti paseksek (stuffing): paglaoken amin a ramen ti paseksek. Ipaigid pay.
2. Iwaen iti agka-innem ti dakkel a bloke ti tofu. Iwaen ti tofu iti sikiganna ngem saan nga ilayon iti maysa a bangirna, ditoy ti pangiserrekan ti paseksek. Ikkan ti maysa kutsara a paseksek wenno no ania ti malaonna. Uliten daytoy aginggana maseksekan amin a tofu.
3. Iti pariok, iprito iti adu a mantika ti tofu nga adda paseksekna. Saan unay a pigsaan ti apoy tapno saan makset ken maluto ti paseksek. Adawen no naluton ti paseksek ken ag-brown bassit ti tofu, agarup walo a minutos. Paik-ikan iti colander wenno pinggan a naap-apan ti papel/kitchen tissue. Uliten aginggana maluto amin a tofu.
4. Ikkatan ti mantika ti pariok a nagprituan ti tofu, mangibati laeng ti 2 kutsara a mantika. Ditoy nga igisa ti bawang ken uong. Kiwaren. Ilaok ti tausi.
5. No naluton ti uong, ikabil ti gawgaw a naikanaw ti maysa tasa a danum. Kiwaren aginggana napalet, agarup lima a minutos. No napalet unay, nayunan ti bassit a danum, ngem no nasayaw unay, nayunan ti maysa kutsarita a gawgaw a naikanaw iti bassit a danum. Ramanan ti sarsa no husto ti apgadna. No kurang, nayunan ti asin. Timplaan ti paminta ken asukar.
6. Ilaok dagiti naprito a tofu ken naiwa a bulong ti sibuyas. Iluto iti 3-5 minutos. Adawen. # nordis.net