Ni BRENDA SUBIDO-DACPANO
www.nordis.net

photo by Brenda Subido-Dacpano

Ti picos ket ginisa a karne a naiwa iti babassit. Kaarngi daytoy ti picadillos, ginisa a karne a giniling ken nateng. Ti picadillos ket putahe ti Spain ken Latin America. Ti nagdumaan ti picos iti picadillos ket ti picos malaukan ti pickles ken saan a giniling wenno tinadtad. Naiwa ti karne iti baassit ken naingpis, kasla pang-igado.

Naramanak daytoy idiay Antipolo, iti ayan da Irma Abeleda. Kinuna na a ti naggapuan na daytoy a putahe ket iti Marikina, Metro Manila. No apay a picos ti awag da ditoy ket saan ko a naduktalan. Nalabit a naggapu met laeng iti sarita ti Espanyol a picado, giniling a karne.

Ramen
1 kilo a karne, giniling wenno naiwa iti babassit ken naingpis
1/4 kilo a pickles a pipino wenno jerkens, naiwa iti pakwadrado a babassit (diced)
1 sibuyas, tinadtad
4 a ngipen a bawang
4 a bell pepper, berde wenno nalabaga, naiwa iti paatiddog ken naingpis
1/4 kilo a carrots, diced
soy sauce
paminta a pangtimpla
mantika a panggisa

Preparasyon
1. Iwaen iti naingpis ken babassit ti karne, mabalin met nga agusar ti giniling. Ilaok ti 1/4 tasa a soy sauce ken ti naguperan ti pickles iti dua oras agingga agpatnag. Nasaysayaat no agpatnag tapno mas maagsep ti karne ti raman ti pickles ken soy sauce
2. Iwaen met dagiti carrots, bell pepper, sibuyas. Pis-iten ken tadtaden ti bawang
3. Ipapudot ti dakkel a pariok, ikabil ti mantika. Igisa ditoy ti sibuyas, bawang ken karne agingga ag-brown bassit. Kiwaren sagpaminsan.
4. Ikabil ti nagiyuperan ti karne ken nayunan pay ti maysa tasa a danum. No saan pay a limmukneng ti karne, nayunan manen ti danum no naatianan daytoy.
5. No naluknengen ti karne ikabil ti carrots ken pickles, kiwaren sagpaminsan.
6. Ikabil ti bell pepper. Iluto iti dua a minutos.
7. Adawen ken idasar a napudot. # nordis.net