Ni BRENDA S. DACPANO

Makán, mangán, kaán….. Adu ti makan ita a panawen ti Krismas agingga iti baro a tawen.

Ugali tayon a Pinoy ti agsagana ti adu a makan nangruna ita a panawen ti panaguummong dagiti pamilya. Ngem no dadduma adu unay met, ket no kua adu ti matedda. Adda ditoy dagiti resipi nga insaganak para kadagiti tedtedda a makan a mabalin nga aramiden tapno agbalin a baro manen ti tedtedda.

Tempura a nateng ken pansit

Ramen: carrots, Baguio beans, broccoli, cauliflower, tedda a pansit bihon wenno canton gisado, mantika a pagprituan

Batter: 1 itlog, 1 tasa nga arina, sangapirit nga asin, danum a pangkanaw

Iwaen a paatiddog ti carrots, imurian dagiti broccoli, cauliflower, ken beans. Aramiden ti tempura batter: batilen ti itlog iti dakkel a malukong. Ilaok ditoy ti arina, asin ken kalalaingan na a kaadu ti danum agingga a kasla kapalet ti para pancake. Ikabil ditoy dagiti naisagana a natnateng. Siguraduen a namalamalan ti amin a paset dagiti natnateng iti tempura batter. Agserbi ti batter a pangdekket iti pansit.

Ikabil ti tedtedda a pansit iti bandehado. Ipatulid ditoy ti nateng nga adda batter na. Iprito iti agburburek a mantika (deep fry). Iserbi nga adda sawsawan a sweet-sour sauce, chili sauce wenno naglaok a mayonnaise ken ketchup.

Ensalada a manok ken nateng

Ramen:
1) tedda a manok (manipud iti roast chicken, adobo wenno pinasengngawan), napersay wenno naiwa iti paatiddog wenno pakuadrado
2) tedda a pansit canton wenno bihon gisado
3) 2 kutsara a diru
4) 2 kutsara a dijon wenno prepared mustard (magatang iti supermarket condiments section)
5) 4 kutsara mayonnaise
6) 1 kutsara canola wenno olive oil
7) sangapirit a paminta
8) sangapirit nga asin
9) 1 ulo ti iceberg lettuce wenno uray ania a klase ti letsugas, naiwa ti paatiddog
10) 1 ulo ti repolyo a maris tarong (purple), naiwa ti naingpis a paatiddog
11) 3 bulong ti sibuyas, naiwa iti 1 pulgada a kaatiddog
12) mantika a pagprituan

Iporma ti pansit a kasla babassit a burger ti langa na. Iprito daytoy iti agburburek a mantika tapno sumarangsang. Iti bassit a malukong nga adda kalub, na paglalauken dagiti ramen 3, 4, 5, 6, 7 ken 8. Kaluban ti malukong santo kulog-kulugen. Iti dakkel a malukong, ilaok dagiti ramen 9, 10 ken 11. Ilaok iti malukong ti nateng ti salad dressing. Iparabaw ti naiwa a manok ken nasarangsang a pansit. Idasar a kas side dish.

Spaghetti Omelet

Ramen:
1) 1/4 kilo tedda nga spaghetti noodles
2) 4 itlog
3) 1 kutsara mantika
4) 1/4 tasa keso, nagadgad

Iti dakkel a malukong, paglauken ti spaghetti noodles ken binatil nga itlog. Ipapudot ti pariok (non-stick no adda), ikabil ti mantika. Siguraduen a maranapan ti pariok iti mantika. Ikabil ti kaguddua ti spaghetti iti pariok. Warakawakan ti ginadgad a keso. Iparabaw ti nabati a guddua ti spaghetti. Iluto aginggana ag-amarilio ti maris na. Kaluban ti daplak a plato santo ibaliktad ti omelet iti inkalub a plato. Isubli iti pariok tapno maluto met ti bangir na.#