Ni BRENDA S. DACPANO
www.nordis.net

Ti yogurt ket mayadi a produkto manipud iti gatas (whole, lowfat, nonfat wenno skim). Gatas ti baka ti kadawyan a maar-aramid a yogurt ngem uray ania a klase ti gatas ket mabalin nga aramiden kas ti gatas ti nuang, kalding, kabayo, ken karnero.

Maaramid ti yogurt babaen iti panangilaok ti bakterya a lactobacillus ken streptococcus iti medyo napudot a gatas (110°F). Dagiti nasao a bakterya ket agparnuay ti lactic acid nga isu ti mangpapalet (coagulte) iti gatas. Umalsem bassit ti raman na ngem adu ti sustansya na. Mabalin nga alunosen wenno kas ramen ti putahe.

Dagiti tao a saan a makainum ti gatas gapu iti allergy iti protina wenno lactose a linaon ti gatas ket mabalin nga uminom ti yogurt. Ti lactase a parnuayen ti yogurt ket mangtulong iti bagi a mangagsep ti lactose. Ti yogurt ket addaan calcium, phosphorus, Vitamins: B2; B5 ken B12, iodine, zinc, potassium, protein ken molybdenum. Dagitoy a sustansya ti mangpaneknek a ti yogurt ket maysa nga health food.

YOGURT I
Ramramit
Double boiler wenno dua a kaserola a mabalin a pagtuonen, termometro a para iti makan (100 agingga 300°F), pagikkan ti yogurt (garapon, plastik wenno stainless steel) nga adda kalub na, aklo, palanggana, incubator. (Kitaen iti baba para iti panagisana ti incubator. Daytoy ti mangkontrol ti pudot a kasapulan tapno pumalet ti yogurt).

Sakbay ti amin, ugasan a naimbag dagiti usaren a pagikkan ti yogurt iti napudot a danum ken sabon. Balnawan ken paanginan tapno mamagaan. Bukbukan dagiti pagikkan ti agburburek a danum. Kaluban agingga naisaganan ti aramiden a yogurt. Isagana ti incubator .

Ramen
a. 4 tasa gatas a likido (whole, lowfat, skim wenno nonfat dry mik). No agusar ti presko a gatas ti baka wenno kalding maspul nga i-pasturize (Kitaen iti baba no kasano nga aramiden daytoy).
b. 1/3 tasa gatas a pulbos, no agusar ti whole wenno lowfat, wenno 2/3 tasa no agusar ti skim wenno nonfat dry
c. 1/4 tasa komersyal a yogurt (magatang iti tiendaan).
d. 2 agingga 4 kutsara asukar wenno diru (segun no kayat, optional).
e. 1 kutsarita gulaman a pulbos (para iti napalet a yogurt).

Ikabil ti pasteurized wenno isterilisado a gatas iti ngato ti double boiler, ilaok ditoy ti nonfat dry gatas a pulbos. Inayon ti asukar wenno diru no kayat yo ti nasam-it ken saan unay a naalsem a yogurt. Ipapudot ti gatas iti 200°F, kiwaren agingga 10 a minutos. Saan a pagbureken. Ikkaten ti akinngato a kaserola ti double boiler ken ipatapaw daytoy iti nalamiis a danum tapno daras a bumaba ti temperatura agingga 125°F. Ikkaten ti kaserola manipud iti nalamiis a danum. Bantayan a saan a bumaba iti 112 agingga 115°F.

Mangala ti maysa tasa iti impapudot a gatas ken ikanaw ti 1/4 kutsara a komersyal a yogurt. Inayon daytoy iti gatas nga adda iti kaserola. Kiwaren ken ibukbok a dagus iti insagana a pagikkan ti yogurt (garapon a naikkan ti agburburek a danum, ikkaten nga unuma ti danum na sakbay nga ikabil ti aramiden a yogurt). Kaluban ti garapon.

Ikabil iti incubator iti uppat nga oras. No nabayag ti pannaka-incubate na umalsem ti yogurt. Kalpasan ti uppat nga oras, ikabil iti refrigerator tapno saan nga umalsem. Agbayag ti yogurt iti sangapulo nga aldaw no maikabil iti refrigerator.

YOGURT II
Ramen
a. 3 tasa impaburek a danum
b. 1/2 tasa gastas a pulbos (whole milk)
c. 2 kutsara a komersyal a yogurt
Iyisterilisa dagiti pagikkan a plastik wenno garapon — bukbukan dagiti pagikkan iti agburburek a danum santo kaluban.

Ibukbok to ti karga na a danum no kasapulanen nga ikabil ti yogurt. Ikanaw ti tallo a tasa a gatas iti danum a napudot (37°C, no awan ti termometro tantyaen ti pudot na, daydiay mainum a saan a masinit ti bibig). Ilaok ti dua kutsara a komersyal a yogurt. Ikabil iti incubator.

Panangisagana ti incubator
Incubator 1: Papudoten ti pugon (oven) iti 200°F santo iddepen. Agusar ti termometro ti pugon tapno mabantayan ti tempertura, saan koma a bumaba iti 100°F ti pudot na. No bumaba, paandaren manen ti pugon tapno dumanon iti 108°F
agingga 112°F ti pudot na santo iddepen.

Incubator 2: Picnic cooler. Ikkabil iti uneg ti cooler ti uppat a garapon a napno ti napudot a danum (140°F). Ikabil met iti cooler ti aramiden a yogurt. Ikkan ti ispasyo iti baet dagiti garapon tapno agsirkulo ti pudot. Kaluban ti cooler.

Incubator 3: Pagsusukoten ti kahon (dua agingga 4 a kahon), kabilan ti nakunes a diaryo iti baet dagiti nagsusukot a kahon. Ituloy a suroten ti proseso iti incubator 2.
Incubator 4: Ikabil ti aramiden a yogurt iti termos a nalawa ti ngiwat na. Kaluban. No napaleten ti yogurt a kasla gulaman, lukatan ti termos sakbay nga ikabil iti refrigerator.

Panang-isterilisa ti gatas
Masapul nga iisterilisa wenno i-pasteurize ti gatas tapno matay dagiti mikrobyo a mangdadael iti presko a gatas. Agusar ti double boiler. Ikkan ti danum ti kaserola nga akinbaba, ipapudot. Ikabil ti gatas iti akinngato a kaserola. Kaluban ti kaserola. Ipapudot agingga dumanon iti 165°F. Kiwaren a kanayon. Pabaawan babaen ti panangitapaw ti
kaserola iti nalamiis a danum. # nordis.net