Ni BRENDA S. DACPANO
www.nordis.net

Agruar dagiti tukak iti panagtutudo. Adu ti magatang iti tiendaan ngem nangina met, P160-180 ti maysa a kilo a nakulanitanen a tukak. Nalaklaka no sibibiag pay, ammo yo la ketdi ti mangkulanit maymayat daytoy a gatangen. No adda kayo met iti asideg ti taltalon, mayat ti agtiliw ti tukak (saan la ketdi nga agbagbagyo).

Saan nga amin a tukak ket makan, adda dagiti makalason a klase. Isu a nasayaat a no saan kayo a sigurado, saludsuden kadagiti makaammo kadagiti klase a mabalin a kanen. Masansan met a dagiti magatang iti tiendaan ket mabalin a kanen.

Ti kadawyan a luto ti tukak ket ‘tay sinabawan nga adda parya na. Igisa ti nakulanitan ken nalinisan a tukak iti bawang, sibuyas ken laya. Sabawan ti arasaw ti bagas. Ipaburek daytoy aginggana maluto ti tukak santo ikabil ti bulong ti parya. Naimas met ti sinabawan a tukak nga addaan sotanghon. Naimas met daytoy nga iyadobo wenno iprito a kasla manok.

Ramen
10 a dadakkel a tukak, nayunan no babbabassit dagiti tukak
¼ kilo a giniling a karne ti baboy wenno manok
3 ngipen a bawang, pinitpit ken tinadtad
tubbog ti 1 kalamansi
1 kutsarita a suka
asin ken paminta a pangtimpla
1 kutsarita nga asukar a brown
mantika a pangprito

Preparasyon
1. Iti malukong, paglalauken dagiti giniling a karne, bawang, tubbog ti kalamansi, asin ken paminta. Bay-an daytoy iti 30 minutos.
2. Kulanitan dagiti tukak. Gedgeden ti tengnged ti tukak ngem saan pay nga ilayon nga isina tapno nalaklaka a lapsuten ti kudil na. Ideppel dagiti ramay iti dapo wenno asin santo daytoy ti usaren a panglapsut iti kudil ti tukak. No nalapsuten ti kudil na ilayonen nga ikkaten ti ulo na. Uliten daytoy aginggana makulanitan amin a tukak. Iwaen ti tiyan tapno maikkat ti bituka. Buguan ken paikikan.
3. Iseksek iti tiyan ti tukak ti natimplaan a karne. Daiten wenno pagkaemen ti tiyan babaen iti toothpick tapno saan nga aglukat bayat iti panagprito.
4. Agtimpla ti suka, asin, asukar ken paminta a narumek. Iyuper ditoy iti 30 minutos ti napaseksekan a tukak. Kalpasan a mauper, paik-ikan santo iprito iti agburburek a mantika aginggana ag-brown ti kolor na. # nordis.net