Ni BRENDA S. DACPANO
www.nordis.net

Caldereta de cabrito. Ti cabrito ket awag dagiti Mexican iti karne ti kalding nga ubing pay. Gagangay a maidasdasar kadagiti ispesyal nga okasyon. Ti kaldereta ket impluwensya ti Espanyol kadatayo iti nabayag a panawen a panangsakop da ditoy pagilian.

Kaldereta a karne ti baboy. Photo by Brenda S. Dacpano/nordis.net

Kadagiti okasyon iti nakaikamangak, kadawyan a siak ti aglutluto iti kastoy a putahe kagiddan ti pinapaitan a kalding ken kilawen a kudil ti kalding. Ngem saan a kasapulan nga adda okasyon tapno agluto ti ispesyal a kaldereta. Tapno makatipid, ta nangina met unay ti karne ti kalding, naglutoak ti kaldereta a baboy. Suruten dagiti ramen a nailanad iti baba, nayunan wenno kissayan depende iti kabaelan ti badyet.

Ramen

1 kilo a karne ti kalding, nategteg iti serving size
2 kutsara nga olive oil
1 dakkel a sibuyas, naiwa
3 ngipen a bawang, naiwa
1/2 tasa a tomato sauce
1/3 tasa a tomato paste
1 kutsara a paprika powder
1/2 bote ti red wine wenno 1/2 tasa a sherry (optional)
1/4 tasa a keso, nagadgad
2 kutsara a bread crumbs wenno narumek a cracker
10 a pidaso a green olives, naibukelan
1-2 pidaso a nalabaga a bell pepper, naiwa
asin ken paminta a pangtimpla
2 kutsara a brandy

Iti dakkel a kaserola, ipaburek ti karne ti kalding iti agarup maysa ket guddua a litro a danum. Ikkan ti nataltal a laya tapno maikkat ti angdot ti kalding. Paik-ikan ken ikkaten ti laya. No agusar ti pork ribs saanen a kasapulan nga aramiden ti kastoy. Idiretso laengen nga igisa ti karne ti baboy.

Iti parehas a kaserola, ipapudot ti olive oil. Igisa ditoy ti sibuyas ken bawang. Inayon nga igisa ti karne agingga ag-brown bassit. Timplaan ti asin, paminta ken paprika. Ikabil dagiti tomato paste ken tomato sauce. Ipaburek iti kalalaingan na nga apuy. No maatianan, nayunan ti danum. Ikabil ti red wine wenno sherry.

Ikabil ti keso ken bread crumbs tapno pumalet ti sarsa. Inayon dagiti olives ken bell peppers. Timplaan ti asin ken paminta. Ikabil ti brandy. Ituloy nga ipaburek iti nakapsut nga apuy aginggga lumukneng ti karne. Patedtedan ti bassit nga olive oil, kiwaren ken idasar a napudot. # nordis.net