A. Panagdara iti ima ken saka
1. Ingato ti nadangran a paset ti bagi, malaksid no ti tulang ket natukkol gaputa ad-adda a madangran babaen ti pananggaraw. Kitaen ti biswal A.

2. Italmeg ti sugat iti nadalus a lupot (wenno ti ima no awan ti lupot). Bedbedan iti nairut (tight bandage) aginggana agsardeng ti panagdara.
3. No ti sugat ket agdardara pay laeng ken tumaros iti lupot, parabawan manen ti lupot ken ituloy ti panangitalmeg.
4. No agdara pay laeng, aramiden dagiti sumaganad:
a)Pagtalinaeden a nakangato ti paset ti bagi nga adda sugatna.
b)Galutan wenno mangikabil ti tourniquet iti nadangran a saka wenno ima iti nagbaetan ti sugat ken ti puso. Kitaen ti biswal B.

Dagiti masapul nga annadan
1. Ikkan laeng ti tourniquet no napalalo ti panagdara ken saan a makontrol babaen ti panangitalmeg ti sugat.
2. Palukayan ti galut tunggal kaguddua nga oras tapno makita no kasapulan pay ti tourniquet ken tapno mapagrikos ti dara iti bagi.
3. No ti nadangran a tao ket iyakar nga adda galut/tourniquet ti sugatna, kasapulan a siassinnoman a mangawat iti pasiente ket mabagaan maipanggep iti kaadda ti galut/tourniquet ken ti oras a naikabil daytoy.

B. Panagdara iti kanal ti lapayag

Ti pannakaiserrek ti natirad ken natadem a banag iti lapayag ket mabalin nga agbanag iti aksidente a pannakasugat wenno pannakalussok ti kanal ti lapayag wenno ear drum. Daytoy ti pakaigapuan ti napalalo a sakit ken panagdara.

Panangagas
1. Ipaidda ti nasugatan.
2. Taparan ti lupot wenno kapas iti ruar ti nadangran a lapayag. Saan a dalusan wenno mangiserrek ti aniaman iti uneg ti lapayag.
3. Pagtomaren ti antibayotiko ti las-ud ti maysa a lawas wenno patedtedan ti antibayotiko ti lapayag iti uneg ti 3 agingga 4 nga aldaw.
4. No agdara pay laeng kalpasan ti pannakaagasna, agpatulong wenno ipakita iti mangngagas.

C. Panagdara ti dila
1. Iggeman ken italmeg ti paset ti dila nga agdardara ken in-innayaden a guyoden.
2. Italmeg ken guyoden iti agarup 10 a minuto.
3. In-innayaden nga ibbatan ti dila ken kitaen no nagsardengen ti panagdarana.
4. No agtultuloy pay laeng ti panagdarana, guyuden manen ti dila. #