Ni BRENDA S. DACPANO

CHIPS, CHIPS, CHIPS. Manipud kannigid (clockwise) violet a kamote, patatas, orange a kamote ken aba. Ada iti tengnga ti yema. Photo by Brenda S. Dacpano/NORDIS

Yema

1 lata a gatas kondensada
10 eggyolks
1 kutsarita a tubbog ti kalamansi

Batilen dagiti eggyolk iti dakkel a malukong. Ilaok ti gatas a kondensada ken kalamansi santo ikabil iti kaserola (non-stick pan no adda). Lutuen iti kalalaingan na a pudot bayat a kiwkiwaren aginggana pumalet ken maisinan ti yema iti kaserola. Palammiisen ken ikabil iti pakuadrado a wax paper wenno plastik nga adda kolorna. Ihulma iti porma a pyramid.

Kamote chips

1 kilo a kamote
mantika
asin ken paminta (segun no kayatyo)

Iwaen iti naingpis ti kamote. Maymayat no maiwa iti mandolin (pagiwa iti naingpis) tapno agpapada ti kaingpisna. Iluto iti agburburek a mantika aginggana agamarilio bassit ti kolorna. Adawen ken ikabil iti metal a sagatan wenno colander tapno maik-ikan ti mantikana. Timplaan iti bassit nga asin ken paminta segun iti kayatyo a timpla. Palammiisen ken ikabil iti plastik santo iserra babaen iti panangisinit ti plastik iti kandila wenno plastic sealer tapno saan a lumammuyot wenno kumulbet.

Imbes a kamote, mabalin nga usaren ti ube, patatas, aba, ken naata a saba a dippig. #