Ni BRENDA S. DACPANO
www.nordis.net

Simple ken nalaka nga isagana, mayat kadagiti health conscious ken naimas.

Photo by Brenda S. Dacpano/nordis.net

Ti ramen a manok ket mabalin nga ilambong, pasengngawan wenno ipatugaw iti asin (pinaupong manok sa asin). Mas konsentrado ti raman na no nailuto nga in-innayad iti asin wenno mapasengngawan ngem nabaybayag daytoy a lutuen, dumanon iti 1 nga oras wenno nasursurok pay segun iti kadakkel dagiti barukong ti manok. Mabalin met a sibubukel a manok ti usaren. No adu ti panawen yo, mayat a lutuen ti manok iti kastoy a wagas.

Ti inaramid ko ket ‘tay pangmabiitan, inlambong. Daydiay naglambungan ket mabalin pay nga aramiden a sopas, laukan ti makaroni wenno noodles.

Ramen

1/2 kilo a barukong ti manok
3 ngipen ti bawang
sibuyas
asin ken paminta a pangtimpla

Ramen ti sarsa

1/4 tasa nga oyster sauce
1 kutsara nga asukar
1/4 tasa a danum
dua kutsara a ginadgad a laya
lengga (optional)

Preparasyon

Bugguan ti manok. Ikabil iti kaserola ken lipusen ti danum. Inayon ditoy ti bawang, sibuyas, asin ken paminta. Ipaburek iti kalalaingan na nga apuy iti agarup 20 minutos. Adawen ken pabaawan. Usaren ti naglambungan iti sabali a putahe.

Aramiden ti sarsa. Ikabil iti kaserola dagiti ramen ti sarsa malaksid iti laya. Ipapudot iti nakapsut nga apuy iti maysa a minuto. No saan nga agusar ti oyster sauce mabalin nga isukat ti soy sauce ken maysa kutsara a gawgaw. Lutuen agingga napalet, agarup lima minutos.

Isagana ti nalambong a manok. Innayaden nga isina ti lasag ti manok manipud iti tulang babaen ti kutsilyo. Iwaen iti guddua pulgada kaingpis. Iplastar iti bandehado wenno pinggan. Iparabaw ti sarsa ken ginadgad a laya. Warakiwakan ti tostado a lengnga.

Naimas nga ikumbinasyon iti chopsuey wenno ensalada a nateng. #