Ni BRENDA S. DACPANO

Idi nabiit pay a naglukat ti Market Encounter, maysa a pangawis ti Panagbenga Festival kadagiti tattao a dumar-ay kadaytoy, napan kami kenni Kath (Okubo, kolumnista iti daytoy a pagiwarnak) nagbuya ti garden landscape idiay skating rink ti Burnham Park. Kalpasan ti sumagmamano a rikos mi kadagiti booth, nagbirok kami ti pagmeriendaan. Nagorder kami ti shawarma ngem di mi nagustuan ta nakamagmaga met ken saan a naimas.

SAWARMA. Ali in front of his shawarma shop at the Panangbenga Trade Fair, Burnham Park. Photo by Brenda S. Dacpano

Idi nakitak ti maysa a gayyem, nagbinningay kami ti kapadasan mainaig iti shawarma idiay Market Encounter. Naibaga na kaniak nga adda kano naimas a shawarwa sadiay. Rinantak a ramanan ti ibagbaga na. Napitak ti dalan ta nagtudo ti karabiian na ngem saan a nailumlom ti gagar ko a mapan idiay pwesto si shawarma. Nakaugaliak ti agbirok ti makan a naidumduma iti tunggal Panagbenga.

Nadanon ko ti pwesto ni Ali a makinkukua ti shawarma booth bayat nga agil-ilgat ti karne a nakasaang iti shawarma machine ti katulungan na a lalaki. Nagorderak ti jumbo with cheese nga adda sarsa na a nagasang. Nangkittabak ti dakkel ket napnuan a talaga ti raman. Kinatungtong ko ni Ali bayat a mangmanganak, maysa isuna a Turkish. Addan 11 a tawen nga agnanaed isuna ditoy Pilipinas, tallo a tawen ditoy Baguio. Nakaasawa isuna ti Pilipina a ni Marina ken naaddaan da ti uppat nga annak.

Sipud kinaadda da ditoy Baguio, kada Panagbenga ket aglaklako da ti shawarma. Imbaga na nga atiddog kano ti pila iti pwesto na kumpara iti dadduma a paggatangan ti shawarma. Napaneknekak dayta ta maysa kadagiti makipilpila ti anak ko.

Ipagarup ko a ti naggapuan ti shawarma ket idiay Greece, idiay gayam Turkey, isu ti kuna ni Ali. Idiay pagilian da, saan nga innapuy ti kankanen da no ti ket ti flatbread nga us-usaren da a pangbalkot ti karne a kas ti shawarma. Mangmangan da met kano ti innapuy ngem sagpaminsan no adda okasyon ken ‘diay basmati rice a nakoloran ti duyaw.

Ni Ali mismo ti mangtimtimpla kadagiti karne, adda laeng katulungan na a para iwa ken mangiserbi. Kinuna na nga adda bukod na a timpla ngem, siyempre, sekreto. Ti sauce nga us-usaren na ket presko a gatas, yogurt ken bawang. Bukod na met nga aramid ti flatbread a maaw-awagan ti kubes.

Ti sao a shawarma ket naggapu iti Turkish a cevirme, a ti kayat na a sawen ket panagtayyek. Daytoy ket maipada iti kebab, a ti kayat na a sawen ket maipatayyek a tinuno.

Mailuto ti shawarma babaen ti panangitudok iti landok kadagiti nailgat a karne ti baka, karnero, pabo wenno manok. Maiparabaw dagiti taba ken sibuyas wenno kamatis a mangted raman iti karne. In-innayad daytoy a maituno bayat nga agtaytayyek (kitaen ti ladawan). Idi agkauna, maituno daytoy iti beggang wenno apuy ngem itatta ket mailuton iti gas (liquefied petroleum gas). No naluton ti akinrabaw a paset, ilgaten daytoy ti naingpis, laukan ti ensalada a natnateng ken sauce santo ibalkot iti flatbread.

Ti kadawyan a mailaok a natnateng ket pipino, kamatis, letsugas ken sibuyas. Dagiti dadduma a naramanak ket adda pay repolyo na. Adu ti mabalin nga ilaok a natnateng segun iti kayat yo.

Ti kadawyan a mailaok a sauce ket keso, mayonnaise ken bawang. Naimas ti timpla ni Ali a sauce ta adda yogurt na, saan a nalanit.

Dandanin maibusko ti kankanek a shawarma ngem awan met ti lako ni Ali a pangibulon. Napan pay isuna gimmatang ti softdrinks iti kaarruba na a pwesto tapno adda pangibulon ko. Idi nalpasak a nangan, intagad nak ni Ali idiay baro a lukat a pwesto na iti deppaar ti burnham. Daytoy kano ti permanente a pwesto na tapno uray saan a panawen ti Panagbenga ket adda paggatangan ti shawarma na.

Adda magatang a shawarma machine ken booth agbalor ti P35,000 para kadagiti mangayat nga agnegosyo. No shawarma machine laeng agbalor ti P15,000. Mabalin a kitaen ti detalye iti internet. #