LA TRINIDAD, Benguet — Dumanon iti 50 nga ektarya a daga iti La Trinidad swamp area ti nalayus gapu iti bagyo a ni Karen.

Kinuna ni Municipal Agriculturist Nida Organo a saan nga amin ket namulaan ti strawberries. Adda dagiti dadduma a natnateng a naimula ditoy a pakaibilangan dagiti sibuyas, letsugas ken celery.

Kadagiti nadakamat a naimula, ti laeng letsugas ti saanen a mabalin a mapagnumaran gaputa ti pannakaiyuper na iti agpatnag ket malungtuten dagitoy.

Impalawag ni Organo a dagiti mulmula nga strawberries, sibuyas ken celery ket mabalin pay nga agungar iti panagsardeng iti tudo. Gapu iti daytoy kinuna ni Organo a saan unay a dakkel ti danyus iti plantasyon ti strawberries iti Betag, La Trinidad gapu ta 10% laeng ti nadadael ken kaaduan ket mabalin pay nga agrusing manipud iti ramut daytoy ken agsaringit pay.

Adda 74 nga ektarya ti mamulmulaan ti strawberries iti La Trinidad. Ngem kadagitoy a panawen ket saan a namulaan amin gaputa saan na pay a tiempo, segun kenni Organo. # P. B. Mangibat/Bombo Radyo