Salun-at tayo, biag tayo: Artipisyal a panaganges
2 MIN READ
No agsardeng ti panaganges
No nagsardeng ti panaganges masapul a maisubli a dagus ti panaganges iti uneg ti 4 a minuto tapno maliklikan ti pannakaperdi ti utek. Importante ti kinapartak. Ammoen ti husto nga aramiden. Praktisen a kanayon dagiti pamay-an iti umuna a panangsaranay tapno nakasagana a tumulong iti panawen ti emergency.
Apay nga agsardeng ti panaganges
No nasullatan ti pagnaan ti angin, saan a makaserrek ken makaruar ti angin iti bara. Dagiti banag a mabalin a mangsullat iti agong, ngiwat ken karabukob a kas dagiti makan, pustiso, sarwa, dara wenno katay ket mabalin a mangserra iti pagnaan ti angin. Ti tao nga awan puotna ket agsanud ti dilana nga isu’t mangsullat iti karabukob.
Ti panagsardeng ti panaganges ket mabalin a gapu iti pannakadangran ti utek. Ti utek ket isu ti mangkontrol iti panaganges. Agsardeng ti normal a panaganges no nadangran ti utek.
No agsardeng ti pananganges, iyaramid a dagus ti umuna a panangagas tapno:
1. Madalusan ti pagnaan ti angin wenno ti aangsan
2. Mangited ti artipisyal a panaganges
Kasano nga ammoen no ti tao ket agang-anges wenno saan
1. Denggen ken riknaen ti panaganges, iyasideg ti lapayagmo iti agong ken ngiwat ti pasiente.
2. Kitaen ti panagngato ken panagbaba ti barukong ken tian ti pasiente.
Kasano ti panangdalus no adda nakasullat iti pagnaan ti angin
1. Patangaden bayat nga ingatngato ti akinbaba a pangal ti pasiente (Biswal C). Tapno agtalinaed daytoy a posisyon ikkan ti pungan wenno nalukot a tualia wenno ules ti akinngato a paset ti bukotna. Daytoy a posisyon ti manglapped iti panagpalikod iti dila ken mangsullat iti pagnaan ti angin.
2. Babaen dagiti ramramaymo, ikkaten ti aniaman a nakasullat iti agong, ngiwat ken karabukob a kas dagiti pustiso, makan, sarwa ken dara.
Ania ti aramiden no adda nakasullat iti karabukob
1. Patakderen a medyo nakarukob ti pasiente sa agtakderka met iti likudanna. Iyarakup dagiti ima iti batog ti rusokna (Biswal A).
2. Italmeg a bigla iti batog ti rusokna. Daytoy ti mangpalubos nga iruar ti angin nga aggapu iti bara nga isu ti mangikkat ti nakasullat iti karabukob. Mabalin a mamin-adu nga aramiden no kasapulan pay.
3. No ti pasiente ket dakkel wenno awan ti puotna: a) pagdataen/ipaidda, b) iparabaw ti imana iti rusokna, c) italmeg wenno pigsaan nga iduron nga ipangato, d) baliwan nga aramiden ti mamin-adu a daras no kasapulan (Biswal B).
4. No ti tao ket saan pay nga umanges uray no awan ti nakasullat iti pagangsanna, ikkan ti artipisyal a pananganges.
Kasano nga aramiden ti artipisyal a panaganges
Ti panangited ti artipisyal a panaganges ket panangparuar ti angin iti bara ti tao a saan nga umang-anges ti normal. Maaramid daytoy babaen ti panangpuyot ti ngiwat wenno ti agong ti pasiente.
1. Ipaidda ti pasiente a nakadata.
2. Dagus nga ikkaten ti aniaman a nakasullat iti agong, ngiwat wenno karabukob.
3. Patangaden ti ulona, ingato ti akinbaba a pangalna (Biswal C).
4. Iparabaw nga italmeg ti ngiwatmo iti nakalukat a ngiwat ti pasiente bayat a pispiselen ti agongna, puyotan iti napigsa ti ngiwatna tapno agngato ti barukongna (Biswal D). Para iti maladaga wenno babassit nga ubbing, puyotan iti naan-annayad.
5. Puyotan manen ti ngiwat ti pasiente. Aramiden daytoy ti 15 a daras iti uneg ti maysa a minuto para kadagiti nataengan ken 20 a daras iti uneg ti maysa a minuto para kadagiti maladaga.
Saan nga isardeng ti panangited ti artipisyal a panaganges agingga a ti pasiente ket makaanges wenno aginggana a di sumangpet ti tulong. Isardeng laeng no ti puso ket saanen nga agpitik uray no namasahen ti pusona (Biswal E). #
