Makan a la Pinoy: Bibingka ken suman

Ni BRENDA S. DACPANO

Piesta ti Natay manen, ngem datay’ a nabiag ti agpiesta iti makan. Ugali tayon a Pinoy ti makikararua (bersyon tayo iti halloween) kalpasan ti panangpasiar kadagiti minataytayo iti kamposanto. Kankanen wenno rice cakes ti kadawyan a maisagana a makan para iti panagkararua. Dua a recipe ti insaganak ita.

Bibingka a kamote-kahoy
* 4 tasa ginadgad a kamote-kahoy
* 1 niyog, naigad
* 1 ½ tasa napudot a danum
* ¼ tasa natunaw a butter
* 3 itlog
* 2 tasa asukar a puraw
* ½ kutsarita vanilla
* bulong ti saba, indalangdang iti apoy tapno nalamuyot

Parabaw a Karamel:
* 300 ml gatas kondensada
* 2 kutsara arina
* 2 itlog, yolk
* 1 tasa keso, ginadgad

Ikabil iti dakkel a malukong ti naigad a niyog, ikkan ti napudot a danum. Pespesen ti niyog tapno makaaramid ti 2 tasa a panggetta. Iti maysa pay a malukong, paglauken dagiti nabati a ramen ti bibingka. Ikabil iti baking pan a naap-apan ti bulong-saba wenno aluminum foil. Saan a punuen unay ti pan tapno adda lugar para iti panagbellad ti kamote-kahoy. Iluto iti pugon a 350°F ti pudotna iti maysa oras.

Iluto iti nakapsut nga apuy ti karamel iti napuskol a kaserola wenno saucepan. Paglalauken dagiti ramen ti caramel malaksid iti keso. Kiwaren a nalaing aginggana pumalet. Iparabaw ti karamel iti naluto a bibingka, agusar ti spatula a pangiwaras ti karamel. Iparabaw ti ginadgad a keso. Ingato ti temperatura ti pugon iti 375°F. Iluto manen iti oven ti bibingka iti 20 agingga 25 minuto wenno aginggana light brown ti kolorna.

Suman
* 2 tasa diket
* 1 kutsara nga asukar (optional)
* ½ kutsarita asin
* bulong ti saba, naidalangdang iti apuy

Arasawen ti diket, paik-ikan. Paglauken dagiti diket, asin ken danum iti kaldero wenno rice cooker. Iluto a kas innapuy. Iluto aginggana maagsep amin ti danumna. Ikiwar ti asukar iti naluto a diket santo balkuten iti naidalangdang a bulong-saba. Mabalin a pormaen a paatiddog a rektanggulo wenno triangulo a kas ti adda iti litrato.

Pasingngawan iti 20 minutos. Naimas a kanen daytoy nga adda ti niyogna a naigad ken asukar wenno agluto ti sawsawan.

Sawsawan ti suman:
* 1 tasa asukar a brown
* 1 tasa getta ti niyog
* ¼ tasa arina a diket

Paglauken dagiti ramen iti kaserola. Kiwaren ken pagbureken aginggana pumalet. #