HUNGDUAN, Ifugao (Feb. 10) — Naisayangkat ti Tunod Ad Hungduan idi Pebrero 9-10, sadiay barangay Hapao, iti daytoy a munisipyo tapno awisen ti imatang dagiti turista ken umili iti kinapateg dagiti paypayew iti inaldaw a kabibiag ti tattao sadiay.

Planting rice is fun especially at the famous Ifugao Rice Terraces! Photo courtesy of Ace Alegre

Ti Tunod ket maysa a tradisyon a maisaysayangkat a ti gandat na ket maingato ti kaammuan dagiti turista iti kinapateg ti rice terraces saan laeng a gapu iti kinapintas na no di ket tapno maammuan da a nasken a masaluadan daytoy kas paset ti napateg a kultura dagiti nainsigudan nga umili.

Segun iti panagbuya dagiti opisyales ti probinsya, saan nga adayo a mapukpukaw ti interes dagiti sigud nga agay-aywan kadagiti payew nga isu ti nagtaudan dagiti kultural a tradisyon ti Ifugao. Isu daytoy ti gapu na a ti Ifugao Rice Terraces ket naibilang kadagiti endagered world heritage sites iti United Nations.

Maysa pay a gandat daytoy a tinawen nga aktibidad ti mangipakita ken mangiparikna kadagiti umili ti kinapateg dagitoy a daga kas paset ti nainsigudan a kultura a rumbeng nga aywanan ken padur-asen da.

Photo by Ces Peta/NORDIS

Nabingay dagiti nag-atendar iti tallo a grupo. Naipan da kadagiti tallo a payew tapno aktwal a padasen da ti ag-tunod. Naiturong ti irigasyon kadagiti paypayew ken naisagana dagitoy para iti bunubon a maitunod.

Ditoy a naturog dagiti nakitunod ken adda naisayangkat a cultural night iti dayta met laeng a rabii.

Dagiti payew iti Ifugao ket nabayag a nagserbi a pagbiagan dagiti nainsigudan nga umili. Addang-addang dagitoy inggana iti ngato ti bantay a napno pay dagiti kaykayo ken isu met ti paggapuan ti danum a para iti irigasyon ken dadduma pay nga usar a para balay. Malaksid iti Hungduan, adda met ti paypayew iti Banaue, Mayoyao ken Kiangan.

Dagiti payew ti mangsus-sustento ti ekonomya ti probinsya, segun kenni Gov. Teodoro Baguilat. Turismo ken agrikultura ti pagbibiagan dagiti tattao, kunna.

Photo courtesy of Gloria A. Tuazon

Inatendaran daytoy ti pito-pulo (70) a katao manipud kadagiti naduma-duma nga ahensya ti gobyerno, eskwelaan ken umili ti Ifugao nga agigyan iti Manila ken media manipud a nagapo pay iti Baguio City.

Daytoy nga aktibidad ket inisponsoran ti Save The Ifugao Terraces Movement (SITMO), ti lokal a gobyerno ti Hunduan ken ti probinsya. # Ces Peta para iti NORDIS