Makan a la Pinoy: Dinardaraan

2 MIN READ

Ni BRENDA S. DACPANO

Datayo a pinoy, no mabalbalin ket awan ti ibelleng tayo nangruna no maipanggep iti panagparti. Gistay amin a lalaem ket adda pakaaramidan na a putahe. Awan ti masayang. Dagiti silet ket maaramid a chicharon bulaklak, igado wenno pinapaitan (iti ayup nga addaan apro). Bopis ti pakaaramidan dagiti bara, kidney, puso ken dadduma pay a lalaem. Dagiti bagis ket naimas a dinardaraan. Mayat met nga aramiden ti pinuneg wenno blood sausage.

Dinardaraan ti lutuen tay’ ita. Adu ti mabalin a lutuen a dinardaraan. Mabalin ti lalaem ti baboy wenno ‘tay lasag na ken mano nga ilgat a taba. Dinardaraan a kalding, baka wenno manok. Mabalin a puro a karne wenno puro a lalaem ken mabalin met a laukan ti extender no agtiptipid tayo (ta bassit metten ti pakaigatangan ti kwarta itatta). No adda mula a sayote, mabalinen a burasen ti bunga na tapno ilaok a pampaadu iti dinardaraan. No adda kaarrubam a nagaget nga agmula ti tabungaw, baka mabalin nga umud-od ti maysa, napia la tadtaden nga ilaok iti dinardaraan. Mayat met nga extender ti sabunganay ken bunga ti papaya a naata.

Ramen:
½ kilo pigi ti baboy, naiwa iti ½ pulgada
½ kilo liempo, naiwa iti ½ puldaga
4 ngipen a bawang, tinadtad
1 sibuyas, tinadtad
2 tasa a danum
2 tasa a dara ti baboy a nalaukan ti ½ tasa a suka
3 sili nga atiddog (pangsigang/jalapeño)
asin ken paminta a pangtimpla

Preparasyon:

1.Iti pariok, igisa ti liempo iti aginggana masisi ti taba na. Inayon ti pigue, iluto aginggana ag-brown bassit. Ikkaten ti sobra a mantika. Inayon ti bawang ken sibuyas nga igisa.

2.Ikabil ti 2 a tasa a danum, paminta ken asin. Iluto nga adda kalub na iti 30-45 minutos wenno aginggana lumukneng ti karne. Nayunan ti danum no kasapulan. Saan a bay-an a mamagaan.

3.Inayon ti sili, dara ken suka. Iluto manen iti 10 a minuto wenno aginggana napalet, kiwaren sagpaminsan tapno saan nga agtutukel ti dara.

4.Idasar a napudot kapares ti innapuy.

ENGLISH VERSION

PORK BLOOD STEW
Ingredients:
½ kilo pork pigue, diced
½ kilo pork liempo, diced
4 cloves garlic, minced
1 onion, minced
2 cups water
2 cups pork blood with ½ cup vinegar
3 jalapeño pepper
salt & pepper to taste

Preparation:

1.Place pork liempo in a pan over medium heat. Saute until oil is rendered. Add pork pigue and saute until light brown. Remove excess oil. Add garlic and onion and saute until onion is translucent.

2.Add 2 cups water, pepper and salt. Cook covered for 30-45 minutes or until meat is tender. Add more liquid if necessary, do not let the meat dry out.

3.Add jalapeño pepper and blood-vinegar mixture. Cook for another 10 minutes or until it thickens, stirring occasionally to avoid curdling.

4.Serve hot with rice.