Ni BRENDA S. DACPANO

No nauma kayon ti nabalkot a turon padasen yo daytoy turon hubad. Agusar met laeng ti pangbalkot ngem agsina nga iprito ti saba ken lumpia wrapper.

Ramen:
20 pidaso a lumpia wrapper
10 pidaso a saba a dippig
1/2 tasa asukar a brown
1/4 tasa a danum
ukis ti lemon wenno orange, ginadgad
mantika

Preparasyon:

1. Iluto iti napuskol a kaserola ti asukar ken danum. Urayen a marunaw ti asukar aginggana agbalin a syrup. Inayon ti ginadgad nga ukis ti lemon wenno orange. Lutuen aginggana napalet bassit ti syrup. Ikkaten iti apuy.

2. Pagkatluen ti saba iti pabaribar. Iprito iti mantika anginggana ag-brown bassit. Adawen ken pabaawan. Pitpiten ti naprito a saba tapno agdaplak. Isubli nga iprito aginggana nasarangsang ti rabaw na. Uliten daytoy aginggana maluto amin a saba.

3. Iwaen iti paatiddog wenno pakwadrado dagiti lumpia wrapper. Itinnag a saggaysa iti napudot a mantika. Balikiden no ag-brown ti bangir na, agarup 30 segundos. Adawen ken pabaawan.

4. Pagtutuonen ti naprito a saba ken lumpia wrapper. Umuna nga ikabil ti saba iti plato, lumpia wrapper ti adda iti rabaw. Aramiden a 3 aginggana 4 a katuunan. Patedtedan daytoy ti syrup. Idasar a napudot bassit.#