Ni BRENDA S. DACPANO
www.nordis.net

LACUB, Abra — Dua a residente ti Sucao, Licuan-Baay ti biktima ti napaay a panagpapatay a napasamak sadiay Brgy. Pacoc, Lacub, Abra idi Pebrero 20, 2013.

Alas tres iti malem ti Pebrero 20 idi napan nangayo iti babaen ti eskwelaan ti Pacoc iti nasao a munisipalidad ti agkayong a Rommel Dican, 21, ken Jessie Ligiw, 27. Saan a nagbayag ket nakigtotda a nakangngeg iti putok ket natamaan ti nagbaetan da. Ti maikadua a putok ket nagistayan natamaan ti sikigan ni Ligiw ken ti maikatlo a putok ket limmabas iti ngatuen ti uloda. Naglingedda iti pupuon ti kaykayo ken nagpaliiw a siniim iti bangir a bantay ti Bantugo a naggapuan ti putok. Nakitada ti tallo a soldado a nakasiring iti paltogda a nakaturong iti ayanda.

Ti Bantay Bantugo iti Poblacion Lacub ket nakaitakderan ti ditatsment ti Charlie Company ti 41st Infantry Battalion Philippine Army nga idadauluan ni Lt. Elmer Totoy. Kaabay ti ditatsment ti medical clinic ken Lacub Elementary School. Bayat iti panagputputok ti paltog, mapan koma damagen ti maysa a titser no apay nga agpalpaltog dagiti soldado ngem pinapanaw ti soldado ti titser ken binagaanda a saan a makibiang.

Kalpasan ti maysa a lawas, idi mapan iti Poblacion Lacub ni Dican kaduana ni asawa ken anak na tapno sarungkaran ti apongna, sinurot ida ti lima a soldado ken kasla mangserra iti dalanda iti napan dimmagas ni Dican idiay tiendaan. “Maamakak a baka adda dakes a mapasamak isu nga inubbak ti anakko ket intuloymi ti nagna, idi tinaliaw ko ida, dakami latta ti kitkitaenda,” kinuna ni Dican. “Gapu iti gistay da panangpapatay kadakami nga agkayong, napalalo a buteng ken panagamak ti rikriknaenmi. Uray ti gagangay a panag-garawmi iti inaldaw ket binaliwanmin,” intuloy ni Dican.

Kinuna ni Dican a kayat na paneknekan ti panaglabsing dagiti kameng ti 41st IBPA ken tapno mapapanaw dagiti soldado ditoy ken maawanen ti panagbutbuteng ken agsubli ti talinaay ditoy lugarmi.

Kalpasan daytoy a pamasak iti met laeng Poblacion Lacub, idi umuna a lawas ti Abril, iti baet ti alas otso agingga alas dies ti rabii, nakangngeg dagiti residente ti agsasaruno a putok (indisciminate firing) a naggapu iti Bantugo ditatsment. Agarup 10 a babbalay ti adda iti asideg ditoy a ditatsment. Maamak dagiti agnanaed ditoy baka adda madangran kadakuada.

Kabayatanna, manipud Abril 3 ket adda ti C130 ken fighter planes a sumaysayang-guseng iti tangatang ti Lacub nga agturong iti paset ti Tineg wenno mangpaspasurot iti karayan ken bantay nga addaan aplikasyon ti minas. Dandanin dua a lawas ti napalabas ngem adda pay latta agtaytayab iti tangatangda. Saludsod dagiti agindeg ditoy no ania ti ar-aramiden ti fighter plane iti lugarda. # nordis.net