By DONNA RABANG PETA
www.nordis.net

ADAMS, Ilocos Norte — Nabuangay ti Salakniban ti Adan wenno Salakniban ti Adams ken Daga a Nagtaudan idi July 14 ditoy kas sungbat dagiti umili iti tuloytuloy ken umir-irteng nga isyu ti panagminas iti lugarda.

Inatendaran daytoy dagiti umili ti Adams, manipud iti sektor ti simbaan, Nainsigudan nga umili, mannalon, kababaihan, driver’s association, tourist guides ken daddumapay.

Nabukel daytoy nga alyansa iti tenga ti agresibo a panangallukoy ti National Commission on Indigenous Peoples (NCIP) ken Benguet Corporation kadagiti umili iti Adams nga umanamong iti panagserrek ti dadakkel a minas.

Naitakder daytoy nga alyansa lima nga aldaw kalpasan a pinirmaan ni Presidente BenignoAquinoJr. ti Executive Order 79.

Sakbay a pormal a pinasingkedan dagiti organizing committee ti pannakabukel ti alyansa, natalantan ti isyu ken kasasaad ti panagminas iti Ilocos Region partikular iti Ilocos Norte. Ditoy met laeng a naibingay dagiti baro a damag no ania dagiti kumpanya nga agtartarigagay nga agminas iti Adams.

Dagitoy nga updates ken kasasaad ket imbingay ti People’s SolidarityAgainst Large Scale and Destructive Mining in Ilocos Norte (PSALMIN).

Inted met ti Ilocos Human Rights Alliance(IHRA) ti oryentasyon mainaig iti Karbengan tao.

Makatulong daytoy nga oryentasyon kadagiti umili no kasano a sangoen ti ipakaseknan iti isyu ti karbengan da iti daga kas nainsigudan nga umili ken kas tao ken nakasilpo iti isyu ti panagminas.

Maysa a linaon ti oryentasyon daytoy nga alyansa ket “ipursigi ken ipasaknapna ti pannakabukel ti tukad- munisipal a panagkaykaysa dagiti umili tapno salakniban ken saluadan ti biag, daga ken kinabaknang iti Adams, bambantay, kabakiran ken karayan.

Agserbi ti alyansa kas sentro ti impormasyon ken kampanya kontra iti panagminas, panangsalaknib iti nagtaudan ken karbengan tao.”

Naipangruna met laeng iti partikular a plano ti alyansa ket panangala iti nalawa a suporta para kadagiti aktibidad ken kampanya nga isayangkat da iti lokal ken probinsyal, makitipon wenno makisilpo kadagiti nadumaduma nga organisasyon ken network a mangitantandudo iti pagsayaatan ti aglawlaw ken pangtao a karbengan kas ti PSALM IN. # nordis.net