By BRENDA S. DACPANO
www.nordis.net

Pang ispesyal nga okasyon a noodles wenno pansit ti Korean ti japchae wenno chapchae. Ti kayat a sawen ti jap ket stir-fried ken ti chae ket natnateng. Naaramid ti noodles manipud iti arina ti patatas, kadawyan a maawagan ti cellophane noodles wenno glass noodles.

Kas iti kimchi, ti japchae ket inaklonen ti pamilyak a kas paset ti kusinami. Nanginngina a bersyon ti ginisa a bihon, ti japchae noodles ket magatang iti Korean stores ngem nalaklaka (P160/kilo) idiay spice ken sari-sari store idiay bagsakan ti natnateng idiay Hangar market iti syudad ti Baguio.

Ramen:

½ kilo japchae noodles
1 carrots
100 gramo togue (mongo sprouts)
100 gramo a tamyaw (bean sprouts)
1 bell pepper
2 ungkay a wansoy wenno cilantro
Bawang
Bulong ti sibuyas wenno leeks
Sesame seeds
2-4 kutsara a sesame oil
Soy sauce
Paminta
asin
1 kutsara nga asukar

Preparasyon:

1. Bugguan dagiti ramen a natnateng. Iwaen iti naingpis a paatiddog dagiti carrots ken bell peper. Iwaen iti naingpis a pa-diagonal ti leeks wenno bulong ti sibuyas kasta met nga iwaen ti wansoy. Rim-iten ken tadtaden ti bawang.

2. Iti dakkel a kaserola, ilambong ti japchae noodles iti danum nga addan sangapirit nga asin. Ipaburek daytoy iti agarup 10 minutos wenno aginggana nalukneng bassit ti noodles (al dente). Paik-ikan iti colander.

3. Iti pariok, ikirog ti sesame seeds iti agarup 30 segundos wenno aginggana ag-brown bassit. Adawen ken ipaigid pay.

4. Iti isu met laeng a pariok, igisa dagiti nateng iti 2 kutsara a sesame oil. Iyuna nga ikabil ti sibuyas santo isaruno ti bawang. Ipisok ti carrots. Kiwaren. Ipisok ti noodles. Timplaan iti soy sauce, asukar ken paminta. Kiwaren. No namaga unay, nayunan ti bassit a danum a naglambongan ti noodles. Ipisok dagiti dadduma pay a ramen malaksid iti wansoy ken sesame seeds.

5. Nayunan ti sesame oil no agkurang. Adawen ken iparabaw ditoy ti wansoy ken sesame seeds. Idasar a napudot wenno nalamiis. # nordis.net