Ni BRENDA S. DACPANO
www.nordis.net

Idiay Sagada, nagpipintas dagiti mabuya iti aglawlaw, nasken a papanan dagiti Sumaguing Cave ken Lumiang (burial) Cave, adda dagiti dissuor ken dadduma pay a porma ti limestone. Sumagmamanon a daras a nagpasiarak sadiay ngem mabilbilang iti maysa a ramay ti makuna nga agidasdasar ti naimas a makan. Ngem di kadi nasaysayaat no kalpasan iti pannagna ken pannakabannog manipud iti panagpasiar ket maganas mo ti mangan no adda naimas a taraon?

No agsapsapul ka ti pakabussogan mapan ka laeng kadagiti karinderia iti sentro ti ili, nagadu ti servings para iti maysa a tao ngem saan a nasken a naimas… ‘tay makuna a mabalin metten. Naimas ti lemon pie idiay coop kasta met sadiay St. Joseph. No kayat mo ti pasta, mayat met ti pasta ti Yoghurt House. Ngem ti yogurt idiay ket nadagsen unay isu a makauma nangruna no awan ti laok wenno toppings na a prutas wenno jam. Kaykayat ko ti yogurt a light (padasenyo daytoy a recipe a naipablaak iti Nordis: http://www.nordis.net/?p=4894).

Iti naudi a panagpasiar ko sadiay, kaduak dagiti gagayyem ko, nagturong kami idiay Gaia Restaurant & zipline, madanon iti agarup 20 minutos no pagnaen manipud iti sentro ti ili. Maysa a vegan restaurant nga agus-usar kadagiti ramen nga organic ken manipud iti lokal. Naimas ti pesto pasta (basil ken olive oil) ngem adda samsam-it na. Naim-imas koma no adda met laeng ti laok na a nuts ken keso, ngem saan da met nga agus-usar ti keso ta vegan restaurant ngarud. Adda iti menu da ti vegetarian adobo, roasted pasta with roasted bell pepper, moong dal with pechay (ti kangrunaan a ramen daytoy ket bukbukel. Ti dal ket importante a paset ti cuisine dagiti Indian, Bangladeshi, Nepali, Pakistani ken Sri Lankan.). Adda pay chips ken black bean dip, humus sandwich ken dadduma pay.

Iti pangkabuklan, ti pannangan idiay Sagada ket saan a kas exciting ken challenging a kas iti panag-spelunking kadagiti kuweba ken panaglagto-lagto kadagiti batbato iti dissuor. Numan pay adda met makuna a naimas kadagiti makan, ti nagpapadaan da ket nangina unay. # nordis.net