By DONNA RABANG PETA
www.nordis.net

LAOAG, Ilocos Norte — Adda dagiti proyekto ken serbisyo ti Gabriela Women’s Party (GWP) a naipaay kadagiti umili iti Ilocos Region. Maysa ditoy ket iti Salun-at. Nasurok 400 katao ti naikkan ti benepisyo manipud iti Priority Development Assistance Fund (PDAF) para iti Medical Assistance Program ti GWP manipud Enero inggana ti Mayo itatta a tawen. Naiturong daytoy a PDAF iti hospital ti Ilocos Training Regional and Medical Center (ITRMC) iti syudad ti San Fernando, La Union.

Kangrunaan a naikkan ti benepisyo iti daytoy a programa ti GWP ket dagiti pasyente a naggapu iti munisipyo ti Naguillian, Aringay, Agoo, Bauang, Sto. Tomas, San Fernando, Bacnotan, San Juan, Balaoan, Luna, San Gabriel, Rosario ken Bagulin iti probisya ti La Union; dagiti pasyente a naggapu iti ili ti Sta. Lucia, Sta. Cruz, Candon, Narvacan, Gali-muyod, Salcedo, Cervantes ken Quirino iti Ilocos Sur. Adda pay dagiti pasyente a nagkiddaw ti tulong para iti pannaka-hospital dagiti pasyente a naggapu ti Abra ken Pangasinan.

Maipaganetget a saan laeng a dagiti kamrng ti GWP ti naikkan iti daytoy a benepisyo nudiket karaman pay ditoy dagiti saan a miembro nangruna dagiti marigrigat wenno indigent a pasyente.

Kinuna ni Linda Caluza, regional coordinator ti GWP-Ilocos, “sipud pay idi nangabak iti eleksyon ti Gabriela Women’s Partylist ket impaay na ti tulong kadagiti umili iti serbisyo iti salunt-at ken nangruna iti pagsayaatan ken karbengan dagiti kababaihan ken ubbing. Maysa laeng ti PDAF kadagiti adu a serbisyo nga impadanon ti GWP kadagiti umili.”

“Adu kadagiti pasyente a natulongan mi ti nangipadanon ti napnuan panagyaman da iti GWP gapu ta nakatulong kami kadagiti marigrigat. Isu a kasapulan kuma nga itultuloy dagiti umili ti suporta da iti GWP gaputa sigurado nga ti umili ti pagserbian na dagiti ipapaay a proyekto ken serbisyo ti partylist tayo a GWP,” innayon ni Caluza.

Ti GWP ket nakapauneg iti Makabayan Coalition, koalisyon dagiti progresibo a partylist a mangitantandudo iti pagsayaatan ken karbengan dagiti umili nangruna iti pulitika ti panagbalbaliw. Saan laeng a ti GWP ti addaan ti PDAF iti ITRMC hospital karaman pay ditoy ti Anakpawis Partylist, Kabataan Partylist ken ACT Teacher’s Partylist. Idinto nga itultuloy met dagiti dadduma a progresibo a partylist ti proyekto da kas ti Bayan Muna Partylist ken uray dagiti dadduma a partlylist kas iti Katribu, Courage ken Akap Bata Partylist ket itultuloy da nga idandanon dagiti serbisyo da nangruna iti kaaw-awayan wenno sulsulinek a lugar a saan unay a madanon ti serbisyo ti gobyerno, katinnulong da dagiti progresibo nga organisasyon.

Malaksid iti ITRMC a pangrehiyon nga hospital, adda pay dagiti pangpubliko nga hospital ti naiturungan ti PDAF ti GWP ken dagiti dadduma pay a progresibo a partylist iti probinsya ti Ilocos Sur ken Ilocos Norte. # nordis.net