By BRENDA S. DACPANO

Ti tofu ket manipud iti soya milk a pimmalet ken naporma a kasla keyk.

Daytoy ti makan a nasustansya ken nalaka. Nabaknang daytoy iti protina, nababa ti linaon na a fat, ken awanan kolesterol. Ti kinaadu ti sustansya a linaon daytoy ket segun iti pannakaaramid na — no kasano kaadu ti napespes a soya milk. No natangtangken ti tofu ad-adu ti sustansya a linaon daytoy. No nalukneng ti tofu, ad-adu ti linaon na a danum.

Ti laeng disbentahe iti tofu ket agkurang daytoy iti dietary fiber a maala iti soybean gapu iti pannakaproseso na. Ngem bentahe met ta maikkat dagiti narigat a marunaw a natural sugar a gapu iti intestinal gas (saan a makapaut-tot).

Adu ti magatang a tofu iti tiendaan ti Baguio, agbalor ti P10 ti maysa a keyk. Kadagiti dadduma a probinsiya, sumagmamano ti makita a kastoy ken awan pay ketdi. Mabalin tayo ti agaramid ti tofu nangruna kadagiti lugar nga addaan mula a soybeans.

Ramen
½ kilo a soybeans
2 kutsarita a natural calcium sulphate wenno gulaman nga awan raman ken kolor na
Danum

Ramienta
Cheesecloth wenno katcha
Molde (karton ti fresh milk, plastic containers wenno uray ania a saan a nalaka a malasang no mabasa)
Pangitalmeg a nalukot a diaryo a nabalkot ti cellophane
Padagsen (plato, langdet, kdpy.)

Preparasyon

1. Iyuper ti soybeans iti danum iti agpatnag (10-20 nga oras). Kaaduen ti ikabil a danum tapno dumakkel a doble ti soybeans.

2. Isagana dagiti molde. Kartiben ti maysa a sikigan ti karton ti gatas, ken abutan dagiti dadduma a paset ti karton. Abutan met dagiti plastic containers tapno maik-ikan ti aramiden a tofu.

3. Ap-apan ti cheesecloth wenno katcha dagiti molde agingga iti sikigan na.

4. Bayuen wenno gilingen dagiti nauper a soybeans agingga napino. (Iproseso iti blender no adda.)

5. Ikabil ti nabayo a soybeans iti dakkel a kaserola wenno kardero. Nayunan ti danum tapno madoble ti kantidad ti soybeans.

6. Ipaburek daytoy iti nakapsut nga apuy. Ikkaten dagiti labutab na iti rabaw. Ipaburek iti 20 inggana 30 minutos bayat a kiwkiwaren.

7. Iti maysa a malukong, runawen ti calcium sulphate wenno gulaman iti ¼ tasa a danum.

8. Ap-apan ti cheesecloth wenno katcha ti sagatan, ibatog ti palanggana wenno kaserola a pagtayaan. Ibukbok ditoy ti naipaburek a soybeans. Ti likido a maala ditoy ket isu ti soy milk nga aramiden a tofu.

9. Pabaawan ti soy milk aggingga 70C santo ikiwar ditoy ti gulaman. No ti tofu ket mangrugin a sumina iti danum, ibukbok kadagiti molde a naap-apan ti katcha santo kaluban met laeng ti katcha. Iparabaw ti diaryo a nabalkot ti cellophane (masapul nga eksakto ti sukat ti diaryo iti molde). Padagsenan ti plato wenno langdet tapno mapespes ken maik-ikan ti tofu.

10. Kalpasan ti 30 minutos, ikkaten ti tofu manipud iti molde. Aramiden daytoy iti palanggana wenno timba nga adda danum na. No saan pay nga usaren, idulin ti tofu a naiyuper iti danum. Agbayag iti 2 agingga 3 nga aldaw a saan nga ikabil iti refrigerator no la ketdi inaldaw a sukatan ti danum a nakauperan na.

Kastoy met laeng ti proseso ti panagaramid ti taho (diay malalaukan ti arnibal ken babassit a sago). Saan unay a paik-ikan tapno saan nga agbalin a keyk.#