2 MIN READ

Ni BRENDA S. DACPANO
www.nordis.net

Sanga-pamilya kami a nagpasiar idiay Metro Manila. Iti panagawidmi, insingasing ti bayaw ko a padasenmi ti mangan idiay Coconut House ta nadamagna a mayat kano sadiay. Tinurongmi ti Quezon Memorial Circle ket binirokmi ti restaurant. Dakkel ti nagdumaan ti lugar sipud idi naudi nga ipapan ko sadiay. Nabayagan kami a nangbirok iti dayta a restaurant, naglikaw-likaw ni lakay a nangdrive iti luganmi, adu a panagsaludsod aginggana dandani kamin makadanon iti simrekan mi a gate idi intudo ti nagsaludsodanmi no sadinno ti ayan ti Coconut House. Idiay met laeng gayam asideg ti entrada!

Maysa a kasaaran a panganan ti Coconut House. Bassit laeng a restaurant ken iti abay daytoy ket kiosko ti icecream. Tinangad mi ti menu a naipaskil iti ngato ti counter. Adu ti pagpilian. Nagorder kami ti binalot a Puso Hipon, Gatadobo, Kalderetang Dagat sa Gata, Bangus Belly Salpicao, Pork Sinigang sa Buko ken Pancit Buko. Ti Puso Hipon ket sabunganay a naiwa iti naingpis a nailuto iti getta ti niog. Diay Kalderatang Dagat ket tuna kaldereta a nailuto iti getta ken tomato sauce. Naimas ken kalalaingan na ti timpla dagitoy malaksid iti Pork Sinigang sa Buko a medyo nakulbet ket nalabit a saanak laeng a nairuam iti nasam-it a sinigang ken kurang ti timpla na a salamagi. Naimas ti ginisa a pancit buko, kasla met laeng ginsado a pancit ngem awan ti ramen na a pancit no di ket kinaros a naganos a niog.

Paboritok ti dessert a buko ice cream ken ti Coco Dessert Combo a kumbinasyon ti tallo: suman nga addaan sawsawan a cocojam-gatas, turon ken coconut icecream.

Iti pangkabuklan, na-enjoy mi ti nangrabii sadiay ta baro a raman ken naisangsangayan. # nordis.net